D'Avisen zum neien Anti-Covid-Mesuren-Text leie lues a lues vir. All Dag kënnt en neien Avis bäi.

De Staatsrot huet säin Avis zum Gesetzesprojet guttgeheescht. Formuléiert ginn zwou formell Oppositiounen, eng dovunner déi d'Unerkenne vun der Equivalenz vun den Impfzertifikater ugeet. Referéiert gëtt sech am Avis och op d'ugestrieft Herdenimmunitéit mat engem Impftaux vun iwwer 80 Prozent fir déi global Populatioun.

De Staatsrot schwätzt zwar keng formell Oppositioun aus, mä stellt eng Hellewull vu Froen, wat dat fakultativ Aféiere vum CovidCheck a private Firmen ugeet. Hei misst am Fall vun engem Refus vum Salarié d'Aarbechtsrecht spille mat alle Sécherheete fir de Salarié. Am Fall vun engem Licenciement abusif wier et un de Geriichter ze tranchéieren.

Beim Staat spillt de Beamtestatut mam Risk vun enger disziplinarescher Sanktioun, wann den Employé, dem CovidCheck net nokënnt, wann dee vu sengem Zerwiss gefuerdert gëtt.

Gewerkschaften an Aarbechtsminister gi sech net eens

D'Gewerkschafte CGFP, LCGB an OGBL sinn och net averstane mam CovidCheck an den Entreprisen a beim Staat. Éischtens well eng ganz Partie wichteg Froen nach net gekläert wieren, wéi zum Beispill zum Dateschutz oder méigleche Sanktiounen, wann e Salarié sech net un déi nei Reegelen hält. An zweetens géif dat zu engem irreparabele Gruef tëscht geimpften an net-geimpfte Leit féieren. Ausserdeem géif dës Mesure Grondfräiheeten aschränken a géint d'Grondrechter verstoussen. Dowéinst fuerderen d'Gewerkschaften eng Drénglechkeetssëtzung mam Premier.

Déi dräi Gewerkschafte wieren awer vun der Regierung consultéiert ginn an do wier och iwwert d’Aféiere vun engem CovidCheck-System op der Aarbecht geschwat ginn, sou den Aarbechtsminister Dan Kersch. "Ech dementéiere formell, wat an deem Communiqué steet" – dat sot den LSAP-Minister den Donneschdeg de Moien an der Chamber zum Schreiwes vun de Gewerkschafte CGFP, LCGB an OGBL.

RTL

Den Dan Kersch widderspriecht den Aussoen vun de Gewerkschaften. / © SIP/JULIEN WARNAND

Och de Collège Médical huet säin Avis eragereecht, wouranner begréisst gëtt, datt de renforcéierte CovidCheck op d'Schaff an den HORECA-Secteur erweidert gëtt. D'Dokteren hätte sech souguer gewënscht, datt dëse Regime och géif fir Sportshalen, Schwämmen a kulturell Manifestatioune gëllen.

De Collège Médical freet sech awer, wat dann d'Konsequenze si fir Salariéen, déi de CovidCheck refuséieren. Et geet een an esou Situatioune vum gesonde Mënscheverstand a vill Flexibilitéit aus.

Och déi consultativ Mënscherechtskommissioun huet hiren Avis erausginn a widderhëlt doranner, dass Drock dat falscht Mëttel wier, fir op d‘Ängschten an d‘Suerge vu net-geipmfte Leit ze äntweren.

Derbäi kéim, dass den obligatoresche CovidCheck, gekoppelt un de Fait, dass d’Testen net méi gratis ass, disproportionéiert Restriktiounen duerstellt an zu diskriminatoresche Situatiounen kéint féieren, schreift d’CCDH.

Dat 17. Anti-Covid-Mesurë-Gesetz gëtt den nächste Méindeg an der Chamber gestëmmt.

D'Chambre des Métiers dogéint erhofft sech, sollt d'Regierung déi nei Mesuren an de CovidCheck esou ëmsetzen, datt een, änlech wéi am Lockdown 2020, de betraffenen Entreprisen, grad am Horeca-Secteur, finanziell Hëllefe stellt, fir eventuell Verloschter duerch dës Mesure auszegläichen.