Dat huet déi demokratesch Partei an engem Communiqué en Dënschdeg de Moie matgedeelt an de Minister och am RTL-Interview confirméiert.

Dem Pierre Gramegna seng Demissioun, als Finanz- a Budgetsminister opzehalen, huet um Dënschdeg fir Iwwerraschung gesuergt.  Als Grond huet hien am Journal op der Télé seng Decisioun genannt, 2023 net méi mat an d'Walen ze goen.

"Ech hu menger Partei dat gesot an ech wëll de Wieler dat och soen. Wann ech déi lescht Wochen a Méint Leit begéint hunn, hu se mech all gefrot, ob ech nach eng Kéier matginn. Ech fannen dem Wieler dierf een näischt virmaachen, et muss een ëm klore Wäin eraus schëdden, et muss ee realistesch sinn an dofir wollt ech dat soen. Ech wëll och dobäi soen, datt ech net aus gesondheetleche Grënn ginn, mä aus deem Grond, deen ech elo grad genannt hunn."

De Pierre Gramegna betount, datt seng Demissioun e Schratt ass, dee gutt iwwerluecht ass an deen näischt mat Flemm ze dinn hätt. Hie géif säin Job nämlech zënter 8 Joer mat Leif a Séil maachen.

D'Diskussioun iwwert seng Successioun wier amgaangen, hie perséinlech hätt sech och scho Gedanken doriwwer gemaach, mä déi, esou de Pierre Gramegna, wéilt hien fir d'éischt mam Premier deelen.

D'Schreiwes vun der DP an d'Reaktioun vum Corinne Cahen

D'Demissioun geschitt aus perséinleche Grënn. D'DP schreift weider, datt een zäitno e Comité directeur aberifft, fir e Successeur ze bestëmmen.

D'Partei seet dem Pierre Gramegna Merci fir seng Verdéngschter, hien hätt d'Finanze sanéiert an eng gerecht Steierreform op de Wee bruecht. Hien hätt sech och fir eng transparent a kompetitiv Finanzplaz agesat, esou de Luef vun der Partei.

"De Pierre Gramegna hat mech an de Premier Xavier Bettel am Viraus iwwer dëse Schratt informéiert", sou d'DP-Presidentin Corinne Cahen, déi an enger éischter Reaktioun Versteesdemech fir dem Pierre Gramegna seng Decisioun gewisen huet.

Et wier e Beruff, dee vill Zäit an Usproch hëlt, a wann een ee gewëssenen Alter hätt, wéilt ee vläicht éischter Zäit mat der Famill verbréngen. "Ech respektéieren de Choix an et deet mer awer extrem leed muss ech soen", sou d'DP-Presidentin a Familljeministesch. De Pierre Gramegna wier aus reng perséinleche Grënn zeréckgetrueden.

Reaktioun vun der DP-Presidentin Corinne Cahen

Et wier nach kee Successeur am Gespréich, sou d'Corinne Cahen. Et géingen och nach keng konkret zirkuléieren. Déi néideg Gremie kéime geschwë beieneen. Well de Pierre Gramegna nach op d'mannst bis d'Enn vum Joer do wier, hätt ee lo nach bëssen Zäit, fir no engem Successeur ze sichen,  sou nach d’Corinne Cahen.

Den 63 Joer ale Pierre Gramegna ass zënter 2013 Finanzminister. Deemools war hien als Externen an d'Regierung nominéiert ginn. 2018 war hien éischtgewielten op der DP-Südlëscht.

De Pierre Gramegna war viru senger politescher Karriär Direkter vun der Chambre de Commerce. Nach virdru war hien ënnert anerem Ambassadeur a Japan a Südkorea. Hien huet Droit an Ekonomie zu Paräis studéiert.

En Dënschdeg den Owend ass de Pierre Gramegna Invité am Journal op der Tëlee.

Eréischt e Méindeg war et d'Annonce, dass d'LSAP-Ministeren Dan Kersch a Romain Schneider hir Posten an der Regierung verloosse wäerten.

Hei den offizielle Communiqué vun der DP