Souwuel den ugeklote Polizist, wéi och den ugeklote Chauffeur, dee sech bei der Policekontroll duerch d’Bascht gemaach huet, hunn ausgesot.

"Ech konnt näischt maachen. Ech konnt nimools domadder rechnen." Dat sot den ugeklote Polizist den Donneschdeg de Moien am Prozess ëm den déidlechen Accident um Lausduer 2018. An der Nuecht op de 14. Abrëll war hien op der Policecamionnette gefuer, déi de Policeauto gerammt huet. En Accident, dee säi beschte Kolleeg, de Polizist Frank, d’Liewe kascht huet, an d’Bäifuererin schwéier blesséiert huet.

Lausduer-Prozess 2. Dag/Reportage Diana Hoffmann

An Tréinen huet hien erzielt, wéi et zum Accident komm ass. Mat héijer Vitesse waren d’Polizisten op der Sich no engem Auto ënnerwee, dee virun enger Policekontroll op der Wemperhaart d’Kéier gemaach hat. Säi Kolleeg de Frank a seng Bäifuererin haten hannert Wäiswampech op der N7 um Lausduer e Won an deem Kontext kontrolléiert. E bëssi méi spéit koum och den Ugeklote mat der Policecamionnette op d’Plaz. D’blo Luucht vu sengem Kolleeg hat hie gesinn an duerch eng Meldung iwwert de Funk war och kloer, datt et sech beim kontrolléierte Won net ëm de gesichten handelt. Well esouwuel hien, wéi och seng Bäifuererin, um Horizont d’Luuchte vun engem Auto gesinn hunn, wollte si de Policeauto passéieren, fir dësen ze kontrolléieren.

Wat sech dunn zougedroen huet, kann op Sekonnen a Meter rekonstruéiert ginn. Dat wéinst den Datespäicher, déi an de Policeautoe sinn. Den ugeklote Polizist, deen d’Camionnette an der Mëtt vun der dräispuereger Strooss gesteiert huet, hätt op enger Distanz vu 60 Meter erkannt, datt de Policewon virun him e Manöver mécht, sou den Expert. Relativ schëtzeg hat säi Kolleeg an der Strooss d’Kéier gemaach. A just 3 Sekonne war den Auto dobäi op 15 Stonnekilometer beschleunegt ginn. Kee Winker war betätegt ginn, deen hätt kënnen op dës Absicht schléisse loossen.

"Frank, wat mëss de?", hätt de Chauffeur vun der Camionnette nach geruff, du wier et och scho bal geschitt gewiescht, sou d’Bäifuererin vum ugeklote Polizist. Du goung alles ganz séier. D’Camionnette gëtt no lénks gezunn, eng Sekonn virum Opprall gëtt d’Brems betätegt. D’Vitesse fält vun 160 op 137 Stonnekilometer, ier et zur Kollisioun kënnt. Dat ganzt ass a manner wéi 2 Sekonne passéiert.

Zu der Fro vum Riichter un den Expert, ob den Accident hätt kënne vum ugeklote Polizist evitéiert ginn, sot hien, et wiere keng Méiglechkeete ginn. Et wier eng natierlech Reaktioun gewiescht, no lénks auszewäichen an ze bremsen. Der selwechter Meenung waren och déi aner Experten, déi en Donneschdeg consultéiert gi waren.

Doriwwer eraus huet och den ugeklote Chauffeur, dee virun der Policekontroll d’Kéier gemaach huet, ausgesot: "Ech hu mat mengem Handelen op der Wemperhaart de Steen un d’Rulle bruecht". Hien hätt awer keen an e geféierleche Manöver verwéckelt an et géing him schrecklech Leed doe fir all déi betraffe Famillen. Als Schëllegen um Accident gesäit hie sech awer net.

De Prozess geet e Freiden de Moie weider mam Requisitoire vum Parquet.