Vun dësem Dënschdeg u muss sech e fréiere Polizist, deen deemools 22 Joer al war, wéinst Doudschlag viru Geriicht an der Stad veräntwerten.

Prozessoptakt: Déidlech Schëss zu Bouneweg / Reportage Diana Hoffmann

D’Faite ginn zeréck op den 11. Abrëll 2018, wou sech e Chauffeur enger Policekontroll zu Bouneweg wollt entzéien. Duerch Schëss vum ugeklote Polizist ass hien déidlech blesséiert ginn.

Wat genee geschitt ass an ob de Polizist deemools aus Noutwier gehandelt huet oder aner Moyene gehat hätt, muss elo gekläert ginn.

Wat ass de Resumé vum éischten Dag?

En hätt aus Noutwier geschoss, huet den ugeklote fréiere Policebeamte en Dënschdeg de Moie gesot, mee en hätt net d’Absicht gehat, een ëmzebréngen. Dat ware sou zimmlech déi eenzeg Wierder vum jonke Mann, deen antëscht de Beruff gewiesselt huet.

De Prozessoptakt stoung nämlech ganz am Zeeche vun den Aussoe vun diversen Experten.

En Ingenieur huet säi Rapport iwwert d’Beweegungsmuster vun den 2 Gefierer, also dem flüchtege Mercedes an dem Policeauto virgestallt. Aus dësem geet ervir, datt de Mercedes mat héijer Vitesse op de Policeauto duergesteiert gi war. Virum Policeauto gouf eng Bremsspuer vu bal 10 Meter gemooss, déi dem Mercedes zouzeuerdnen ass. Dono gouf de Policeauto ëmfuer. Den Ingenieur huet hei betount, wéi neelech dëse Manöver um Policeauto laanscht gefouert huet.

Den Expert an der Ballistik huet gesot, datt wärend dësem Manöver den deemolege Polizist 3 Schëss op den Auto ofginn hätt. Een duerch déi viischt Pare-brise, een duerch d’Säitefënster vun der Bäifuerersäit an nach een duerch déi hënnescht Fënster.

Dono huet de Mercedes d’Mauer vun engem Haus gesträift an ass mat enger Vitess ëm 25 Kilometer an der Stonn an e Bam gerannt a stoe bliwwen. Ob den Auto virdrun zréckgesat hat, doriwwer konnt den Expert keng Ausso maachen. D'Fro, déi elo nach am Detail soll gekläert ginn, ass, wou genee de Polizist stoung, wou en de Schoss ofginn huet.

Déi nächst Deeg wäerten nach eng ganz Rei Zeien an Experte gehéiert ginn. Da gëtt och nach e laange Film vun der Rekonstruktioun vun de Faite gewisen. De Prozess ass op 3 Wochen ugesat.