D'Prinzessin Alexandra an den Nicolas Bagory hu sech d'Jo-Wuert ginn
E Samschdeg am Nomëtteg sinn d'Prinzessin Alexandra an den Nicolas Bagory an enger ziviller Hochzäit op der Stater Gemeng bestuet ginn.
Kuerz viru 15 Auer sinn d'Koppel an hir Gäscht bei der Stater Gemeng um Knuedler ukomm.
Déi zivil Zeremonie war um 15.30 Auer am private Krees bannen an der Gemeng.
Géint 16.00 Auer huet déi frësch bestuete Koppel d'Gemeng verlooss a sech de Leit um Knuedler gewisen a Felicitatiounen entgéint geholl.
Fir d'Prinzessin Alexandra an den Nicolas Bagory, wéi och fir de Rescht vun der groussherzoglecher Famill ass et dunn a Richtung Palais gaangen, wou kuerz virun 18 Auer d'Invitéë vun der Hochzäitsfeier erwaart goufen.
Um 18 Auer war et am Palais eng Receptioun, un där nieft der groussherzoglecher Famill an der Famill Bagory och eng Rei national Politiker deelgeholl hunn.
