D'Feier am Gemengenhaus zu Jonglënster ass geläscht
De CGDIS huet dës Nouvelle e Samschdeg an engem Schreiwes matgedeelt.
36 Stonnen, nodeems d'Pompjeeë wéinst engem Brand am Gemengenhaus zu Jonglënster alarméiert goufen, ass d'Feier geläscht. Um 13 Auer e Samschdeg de Mëtteg goufen d'Mesurë vum CGDIS op der Plaz opgehuewen an den Asaz ass eriwwer, sou de CGDIS an engem Schreiwes.
Wéi et weider heescht, hätten e Freideg den Owend 90 Pompjeeën d'Situatioun op der Plaz stabiliséieren, ma ouni awer d'Feier läschen ze kënnen. Duerch de Brand wieren Deeler vum Gebai an de Koup gefall an dofir wier een net un all d'Brandnäschter am Archiv vun der Gemeng komm.
An der Nuecht op e Samschdeg wier eng Ekipp vun 20 Leit op der Plaz bliwwen, fir en nees Opflame vum Brand ze verhënneren. E Samschdeg de Moien hätt een du mat Hëllef vun engem Bagger d'Iwwerreschter vum Gebai weider ausernee geholl an déi lescht waarm Plazen hätte kënne geläscht ginn, sou de CGDIS weider.
Am Ganze waren 130 fräiwëlleg a professionell Pompjeeën un dësem komplexen Asaz bedeelegt. Ënnerstëtzt goufe si vum Operational Technology Support Group mat enger spezialiséierter Dron an dem Logistic Support Center.
"E ganz ellenen Dag fir eis Gemeng"
Wéi de CGDIS e Freideg matgedeelt hat, hat d'Gemeng zu Jonglënster e Freideg kuerz no Mëtternuecht Feier gefaangen. Wéi de Buergermeeschter Ben Ries RTL géintiwwer confirméiert huet, gouf et keng Blesséierter, ma de Schued ass héich.
An engem Bäitrag op Facebook huet d'Gemeng e Freideg den Owend vun engem "ganz ellenen Dag" geschwat. D'Gemeng huet dann och dem CGDIS an dem Gemengepersonal Merci gesot, déi hiert Bescht ginn hunn, Dokumenter ze retten, "obwuel et nach ëmmer brennt".
Iwwert den Internet- an de Facebooksite vun der Gemeng géif kommunizéiert ginn, esoubal ee wéisst, wou d'Déngschter vun der Gemeng an Zukunft kënnen ugebuede ginn. Am Bäitrag mat derbäi si Fotoen, déi d'Ausmooss vun der Zerstéierung an déi betraffe Gesiichter vun deene weisen, déi um Asaz bedeelegt waren. Këschteweis Dokumenter schéngen nach rechtzäiteg a Sécherheet bruecht ginn ze sinn.
Gespär vu Gemengenhaus gëtt erofgeholl - speziell Hotline fir Bierger en place
Betraff, esou de Paul Schroeder, waren d'Gespär vum Gebai an domadder och d'Archive vun der Gemeng. Den Daachstull ass zesummegefall a läit op den Archiven. Géint 7.30 Auer war et och nach genau do, also an den Archiven, wou d'Pabeiere gelagert ginn, wou et nach gebrannt huet. Kuerz virun 8 Auer de Moie gouf e Bagger organiséiert, fir d'Holz vum Daach erauszehuelen, well et do drënner nach brennt. Et gëtt domat gerechent, datt den Asaz nach bis an de spéide Freideg eran dauert.
Rezent eréischt war d’Gemeng vergréissert ginn an am Mee zejoert war déi Extensioun offiziell ageweit ginn. Deen Deel wär net betraff. Dat aalt Bauerenhaus an den Deel niewendru si concernéiert a wäerten net méi benotzt kënne ginn. Fir d'Läschaarbechten ze ënnerstëtzen, gouf e Bagger ugefuerdert, deen eben d'Gespär an och Deeler vun den Archiven ofdréit.
Am schlëmmste betraff sinn deemno d'Archiven. En Deel dovu wier schonn digitaliséiert ginn an e puer Saache konnten an der Nuecht och nach aus dem Gebai niewendru gerett ginn. Éischten Informatiounen no dierft awer wuel kaum nach eppes aus den Archive kënne recuperéiert ginn. D'Nationalarchiv war e Freideg de Mëtteg op der Plaz, fir ze kucken, wéi een en Deel vun den Dokumenter awer nach rette kéint.
Weider heescht et vum Gemengepapp, datt d'Servicer vun der Gemeng wäerten déi nächst Deeg zoubleiwen. An engem offizielle Schreiwes vun der Gemeng steet iwwerdeem, datt d'Gemeng de Bierger matdeele wäert, a wéi enger Form a wou d'Servicer an Zukunft nees kënnen ugebuede ginn. Et géing op jiddefalls probéiert ginn, déi wichtegst Servicer bis en Dënschdeg erëm z'assuréieren. Bis dohi gëllt d'Noutfall-Nummer 78 72 72 - 1000, iwwer déi d'Bierger d'Gemeng erreeche kënnen. D'Nummer soll awer ausdrécklech just am Noutfall benotzt ginn.
Op der Plaz sinn ënnert anerem d'Ekippe vu Jonglënster, Mensder, Hiefenech, Lëntgen, Konsdref, Manternach, Wuermer, Walfer, Steesel, Kielen, Rouspert, Biissen, Réimech an der Stad. Nodeems schonn an der Nuecht eng 60 Pompjeeë mat Dréileederen an Otemschutzgeräter am Asaz waren, goufen um fréie Freidegmoie weider Ekippe fir eng Relève mobiliséiert. Nieft den Ekippe vum CGDIS an dem Centre de soutien logistique waren och d'Police an d'Waasserwirtschaftsamt op der Plaz.
Iwwer d'Ursaache vum Feier ass bis ewell näischt gewosst, betount de Buergermeeschter Ben Ries nach.
Reaktioune live vun der Plaz
De Gilbert Hoffmann, Asazleeder vum CGDIS, e Freideg de Moie fréi.
De Jonglënster Buergermeeschter Ben Ries um 7 Auer am Moiesjournal
D'Maxime Gillen um 7.30 Auer live vu Jonglënster
