Déi éischt definitiv Resultater vun enger Proporzgemeng aus dem Walbezierk Süden koume vu Stengefort. Hei konnt d’LSAP 2 Sëtz dobäi gewannen a sech mat insgesamt 7 vun 11 Sëtz déi absolut Majoritéit sécheren. Dem Samy Wagner vun de Stengeforter Sozialisten no hätt hie selwer net mat esou engem Resultat gerechent. Ma et hätt een déi lescht Legislaturperiod eng gerecht Politik gemaach a vill op Biergerbedeelegung an Inhalter gesat. Dat hätt wuel den Ënnerscheed gemaach.
Zu Mamerwar dann d’CSV de klore Walgewënner. D’Partei vum Buergermeeschter Gilles Roth gewënnt ee Sëtz dobäi a kënnt elo op 7 Sëtz am Gemengerot. Wéi de Gilles Roth um RTL-Mikro erkläert huet, hätt d’Koalitioun mat der LSAP e gudde Bilan virzeweisen a wier dowéinst vum Wieler confirméiert ginn. Dat huet och d’Francine Closner vun der LSAP esou gesinn. Fir d’LSAP wier et iwwerdeems gutt, dass een elo erëm déi zweetstäerkste Kraaft zu Mamer wier.
Zu Déifferdenghat sech scho fréi eng däitlech Victoire vun der LSAP ugedeit. Um Enn gewënnt d’LSAP hei 2 Sëtz bäi. Hiere Spëtzekandidat Guy Altmeisch huet schonn um fréie Sonndegowend vun enger grousser Victoire fir d’Déifferdenger Sozialiste geschwat. Dem CSV-Schäffen Tom Ulveling no hätt een natierlech gehofft, stäerkste Kraaft ze ginn. Ma et wier een zefridden domadder, 1 Sëtz dobäi kritt ze hunn an et kéint ee mam Resultat liewen.
Dem Guy Altmeisch no wier et elo un der LSAP fir mat deenen anere Parteien iwwer eng méiglech Koalitioun ze schwätzen.
De grousse Verléierer vun de Walen zu Déifferdeng sinn dann déi Gréng. Si kréie knapp 22 Prozent manner Stëmmen ewéi nach 2017. Dat bedeit e Verloscht vu 4 Sëtz am Gemengerot. Domat falen déi Gréng hannert d’DP zeréck, déi 1 Sëtz bäikréien. Dem Laura Pregno no hätten eng Partie Facteuren zum Stëmmeverloscht bäigedroen. D’Affär Gaardenhaischen an de Wiessel um Buergermeeschterposten hätte sécher eng Roll gespillt.
Zu Esch-Uelzecht, der gréisster Gemeng aus dem Süde war et iwwerdeems enorm spannend. Um Enn konnt d’LSAP sech mat 57.719 Stëmme ganz knapp virun der CSV duerchsetzen. Déi Chrëschtsozial kommen zu Esch op 57.638 Wieler.
Eng kloer Affär war et dann zu Rëmeleng. Hei wannen d’Sozialisten 1 Sëtz bäi a kréien déi absolut Majoritéit zeréck, déi si 2017 verluer hunn. De Rëmelenger Buergermeeschter Henri Haine weist sech dann och deementspriechend zefridden.
Besonnesch batter war de Walowend fir d’Majoritéit zu Péiteng, wou den aktuellen Buergermeeschter Pierre Melina wuel nach mat an d’Walen goung, mä kloer war, datt hie kee Mandat méi wéilt unhuelen. Dat bréngt e Minus vun 12 Punkten an zwee Sëtz. De Romain Mertzig vun der LSAP läit um Enn souguer ëm 300 Stëmmen virum Deputéierte Jean-Marie Halsdorf, dee sech als neie Buergermeeschter gesinn hätt.
Deementspriechend enttäuscht war den CSV-Politiker och gëscht den Owend um RTL-Mikro.
De Walgewënner zu Péiteng sinn d’Piraten mat engem Plus vun zwee Sëtz, sou dass fir de Marc Goergen och kee Wee laanscht d’Piraten féiert, fir eng Dräier-Koalitioun mat der DP an der LSAP ze forméieren.
D’LSAP kéint allemol mam Romain Mertzig de Buergermeeschter stellen, Schäffen kéinte fir d’DP d’Barbara Agostino oder d’Marie-Louise Berens ginn an natierlech de Marc Goergen. 6 Sëtz ass dat schlechtst Resultat fir d’CSV zu Péiteng zanter iwwer 2 Joerzéngten.
Fannt hei dat komplett Walresultat vu Péiteng.
Hei fannt Dir den Iwwerbléck vun de Resultater vun alleguer de Gemengen.
