Dës Kéier diskutéieren d'Marie Gales an de Pierre Weimerskirch iwwert de Coronavirus, dëst mat der Gesondheetsministesch.

De komplette Podcast fannt Dir op RTL Play.

De Bléck op déi rezent Zuelen, déi nei Ouverture bei de Mesuren diskutéiere mir. Wéi geet et am Summer virun, wat erwaart eis am Hierscht? Wéi schwéier ass et Decisiounen ze huelen a wat behält d'Madamm Lenert aus dëser Pandemie zréck? Dës Froen an nach vill anerer huele mir duerch an eisem leschte Corona-Podcast.

RTL

"Am Idealfall musse mer keng Coronawell méi briechen, mä kréien se esou kleng gehalen, datt se einfach ze geréieren ass."Dat seet d'Gesondheetsministesch Paulette Lenert.

No 30 Episoden an deenen et all méiglech Äntwerten op Froen iwwert de Virus gouf, halen d'Kollege Marie Gales a Pierre Weimerskirch mat der Produktioun op. Si sinn awer prett virunzefueren, soubal eng nei Infektiounswell sollt kommen.

Och de Gesondheetsministère bleift virbereet, fir de Fall, datt d'Zuelen nach eng Kéier klammen. D'Ministesch Paulette Lenert seet, et hätt een awer elo eng ganz aner Ausgangspositioun.

"De groussen Deel vun de Leit wäert op alle Fall eng Basisimpfung hunn. Ech ginn dovunner aus, wann nach eng Kéier eppes kënnt, datt ee ganz aner Moyenen huet, fir da mat enger Zousazimpfung dat am Grëff ze behalen oder anescht an de Grëff ze kréien. Et ass an déi Richtung, wou mer schaffen.

Fir de Rescht si mer gutt arodéiert. Wann eppes kënnt, hu mer elo de Virdeel, datt ee ganz séier erëm weess, wéi ee sech opstellt, fir dat Ganzt anzedämmen. Ech ginn awer dovunner aus, datt d'Situatioun net méi esou wäert sinn, wéi se elo dëst Joer war, well einfach d'Ausgangsbasis eng ganz aner ass um Niveau vun der Immunitéit déi d'Leit hunn, sief et iwwer Covid selwer, sief et iwwert d'Impfung."

Eng Erausfuerderung bleift fir d'Paulette Lenert ze gesinn, ob de Vaccin och bei neie Varianten duergeet.
D'Chancen, fir erëm geschwënn dat "normaalt" Liewen zeréckzekréien, si grouss.

"Ech schléissen op alle Fall net aus, datt mer am Hierscht erëm Normalitéit hunn. Et ass awer och net auszeschléissen, datt nach eng Kéier e Schub kënnt, mä deen Ament si mir sécherlech preparéiert, mat all den Outilen, déi eis Strategien ausmaachen. Dat ass testen, tracen, all déi Instrumenter, déi mer elo haten."

D'Mëttel, déi ee bis elo gehat hätt, fir géint de Virus ze kämpfen, seet d'Paulette Lenert, kéinten zu all Ament reaktivéiert ginn. D'Gesondheetsministesch betount awer och, datt et weider wichteg ass, an de Large Scale Testing ze goen.

Wann Dir nach weider Froen hunn, schreift eis op wellebriecher@rtl.lu

Link: pierre.weimerskirch.net

Den neie Podcast "Wellebriecher" elo all Woch op, RTL Play, Spotify an iTunes.