Eisen Invité vun der Redaktioun e Freideg de Moie war de Finanzminister Pierre Gramegna.

D’Regierung wëll – laut Koalitiounsaccord jo – eng generell Individualiséierung bei de Steieren aféieren. "Den Ament ass et nach vill ze fréi, fir an den Detail ze goen. Mir sinn elo mol an enger Preparatiounsphase", sou den DP Finanzminister Pierre Gramegna um Freideg de Moien de Moien hei op RTL. Et hätt een nach Joren Zäit fir z'iwwerleeën, wat déi beschte Léisung wier. Wa bis d’Pisten ausgeschafft wieren, missten nach Diskussioune mat ënnert de Regierungsparteie gefouert ginn.

Op d’Fro ob dann tatsächlech „kee bei der Reform“ soll eppes verléieren, huet de Pierre Gramegna déi hei Äntwert ginn: „Nee, ech mengen wat elo wichteg ass, dat ass datt mer kënne Mol Pisten ausschaffen. Dat ass, wat mir am Gaang sinn ze maachen, iert een elo definitiv Säz mécht“. Hie kéint nëmmen op de Koalitiounsaccord verweisen.

Am Accord steet op Säit 118 Folgendes: "Een eenzege Barème soll d’Leit - virun allem déi mi vulnerabel - steierlech entlaaschten a gläichzäiteg der Presenz vu Kanner an engem Stot Rechnung droen. Fir equitabel a previsibel ze sinn, wäert d’Regierung sécherstellen, datt et appropriéiert Kompensatiounsmesuren an Transitiounsphase ginn."

Ze fréi wier et och fir ze soen, ob d’nächst Joer op en neits d’Accisen um Bensin an Diesel erëm an d’Luucht gesat ginn. Vum 1. Mee u gëtt de Bensin jo 1 Cent de Liter méi deier an den Diesel 2 Cent. Wann de Verbrauch vu Bensin an Diesel awer weider eropgeet, sou wéi di lescht Joren, da géing Lëtzebuerg seng CO2-Reduktiounsziler net erreechen, sou de Finanzminister. Um Schluss vum Joer géing gekuckt ginn, wéi een Effet d’Hausse vun dësem Joer wäert gehat hunn.

Weidere Sujet um Freideg de Moien hei op der Antenne: d’Iwwerleeunge fir méi Geld an de „fonds souverain intergenerationnel“ ze speisen. De Pierre Gramegna sot et kéint ee beispillsweis wéi bei der Kooperatiounshëllef einfach e gewësse Prozentsaz vum Bruttonationalprodukt – dem RNB – an de Fong fléisse loossen.

Um Freideg den Owend ass de Pierre Gramegna och Invité op RTL Télé Lëtzebuerg.

AUDIO: Invité vun der Redaktioun: Pierre Gramegna
Pierre Gramegna um Plateau bei der Télé
De Finanzminister war e Freideg den Owend den Invité am Journal vun RTL Télé Lëtzebuerg.

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.