D'Chargée de Direction vum Kanner- a Jugendtelefon, d'Barbara Gorges-Wagner, war e Freideg de Moien eisen Invité vun der Redaktioun.

D'Sozial- Medien an den Internet allgemeng, respektiv de Cybermobbing. Dat sinn d'Haaptgrënn, firwat de Kanner- an Jugendtelefon ëmmer méi dacks kontaktéiert gëtt. Dat sot d’Barbara Gorges-Wagner e Freideg de Moien als eis Invité vun der Redaktioun.

D’Chargée de direction vum Kanner- a Jugend-Telefon bewäert dës nei Technologien, mat deenen déi Jonk ëmmer méi fréi a Kontakt kommen, als eng vun den Haaptursaachen, firwat Jonker Problemer hunn.

D’Helpline gouf zejoert iwwer 1600 Mol ugeruff.

Dat war bal 300 Mol méi wéi nach 2017. Um engem géif dat dru leien, dass de Bekanntheetsgrad vum Kanner- a Jugend-Telefon geklommen ass. Zum aneren awer och, well Mobbing, respektiv Cybermobbing bei de Jonken ëmmer méi verbreet wier.

An och d'Elteren fannen Hëllef beim konventionéierten Service. Well net nëmme d'Kanner , mä och d'Elteren an d'Schoule missen de richtegen Ëmgang mat de moderne Kommunikatiounstechnologië léieren.

6 Leit schaffe fest beim Kanner- a Jugendtelefon. Iwwer 70 Benevoller schaffen iwwerdeems bei der Helpline.

Et wier wichteg, dass déi Jonk e neutralen Uspriechpartner hätten, mat deem si anonym a vertraulech iwwert hir Problemer kéinte schwätzen. Am anere Fall, ginn déi Concernéiert un déi adequat sozial, juristesch oder medezinesch Servicer weidergeleet.

Weider Informatiounen zum Thema, fann dir um www.kjt.lu

AUDIO: Invité vun der Redaktioun: Barbara Gorges-Wagner

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.