De Gewerkschaftler war en Donneschdeg de Moien eisen Invité vun der Redaktioun, fir iwwer de Lëtzebuerger Stolsecteur ze schwätzen.

E Mëttwoch am Nomëtteg war déi éischt Ronn op der Conciliatioun, well et net weider geet mat engem neie Kollektiv-Vertrag an der Stol-Industrie.

Leider wier et e Fakt, dass et vu vir eran ni mam Patron vun ArcelorMittal zu engem Kompromëss kënnt, mat deem béid Säiten zefridde sinn, sot de Robert Fornieri vum LCGB en Donneschdeg de Moien als eisen Invité vun der Redaktioun.

Déi zwou representativ Gewerkschaften an der Siderurgie, also den LCGB an den OGBL, géifen awer an dësem Dossier un engem Strang zéien. Et erwaart ee sech endlech e klore Message vun der Direktioun vum Stol-Gigant, fir endlech de Salariéen entgéint ze kommen.

Wat den ominéisen Accord "Lux 2019 " ugeet, huet sech de Robert Fornieri virop mol iwwerrascht iwwert deen Numm gewisen, well hien dee bis ewell nach guer net héieren hätt. Bis elo hu Lux-Accorden am Stolsecteur sozial Begleetmesuren an Investissementer virgesinn, ma de leschten Accord, de Post Lux2016, deen elo am Juli ofleeft, hat en Enn vun enger Rei sou Mesuren festgehalen.

D’Gewerkschafte verlaangen eng nei Tripartite fir en neien Accord. Dëst ëmsou méi, well d’Direktioun vun ArcelorMittal schonn e sougenannten Transformatiounsplang ugekënnegt huet. Dës gesäit strukturell Ännerunge vir, fir sech ënnert anerem un technolgesch an digital Evolutiounen unzepassen. LCGB an OGBL si skeptesch a wëlle matschwätzen.

AUDIO: Invité vun der Redaktioun: Robert Fornieri

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.