E Méindeg de Moie war de Wirtschaftsminister eisen Invité vun der Redaktioun.

"Ech hunn iwwerhaapt net diskutéiert, ech krut et just zougedroen an hunn direkt ofgewonk". Dat sot den Etienne Schneider e Méindeg de Moien als eisen Invité vun der Redaktioun, ugeschwat op d’Geschicht vun e Freideg, dass en CSV-Member d’LSAP an d’DP soll gefrot hunn, fir mat hinnen eng Koalitioun anzegoen.

Et wier eppes, wat hien ni ëffentlech ernimmt hätt, wann et net e Freideg an der Zeitung gestanen hätt, sou den Etienne Schneider weider. Et wier net säi Genre, deen him gefält fir Politik ze maachen. D’Beweeggrënn vun der CSV wieren, fir de Vize-Premier awer evident, nämlech dass si nees sou séier wéi méiglech an d’Regierung kommen, ouni mussen déi nächst Walen ofzewaarden.

Weder d’DP, nach hie selwer wieren awer drop agaangen.

Den Etienne Schneider huet iwwerdeems confirméiert, dass no dëser Legislaturperiod seng Zäit als Politik wuel wäert eriwwer sinn. Hie wéilt net ofhängeg gi vun enger héijer politescher Positioun. Dat géif derzou féieren, dass een nämlech dann net méi déi richteg Decisiounen kéint huelen, mä aus Walkampf-technesche Grënn handelt. Dat wéilt hien net. Hie wäert deemno virum Oflaf vun dëser Legilaturperiod seng Mandater nach ofginn.

Bis den 11. Oktober ass iwwerdeems eng Space Mining Week hei zu Lëtzebuerg geplangt. Do solle sech eng 300 Experten aus dem Beräich treffen, fir sech hei ënnert anerem auszetauschen. D'lescht Joer war schonn ee Space Summit, dee grousse Succès hat, dofir dann elo d'Erweideren op eng Woch. D'Initiative kritt ëmmer méi Interêt op europäeschem Niveau, esou den Etienne Schneider. No der Faillite vun der amerikanescher Entreprise Planetary Ressources hätt ee keng weider Entreprisë gehat, déi an eng Schiflag gerode wieren.
Am Gespréich gouf och d'Diversifikatioun vun der SES ugeschwat. Am Satellitte-Secteur gëtt et nämlech vill Beweegung an d'SES muss weider Marchéen fannen.

Extrait Etienne Schneider
Invité vun der Redaktioun: Etienne Schneider

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.