E Mëttwoch de Moie war de Generaldirekter vun der CMCM eisen Invité vun der Redaktioun.

D'CMCM wier eng Gesondheetsmutuelle an net kommerziell. Dat huet hire Generaldirekter, de Fabio Secci, am RTL-Interview ënnerstrach

Vun de Cotisatioune géifen iwwer 90% un d'Memberen zeréck goen, a Form vu Prestatiounen. 270.000 Memberen zielt d'Mutuelle de Moment. Bei de Kontrakter hätt een op den 1. Januar dëst Joer e Plus vun 30 Prozent verzeechent.

D'CMCM géif och all Mënsch ophuelen, gesond oder krank, al oder jonk. Wann Abuse festgestallt ginn, gëllt eng Strofkarenzzäit oder et kann een ausgeschloss ginn.

Bis 2021 ginn d'Prestatiounen nei gestaffelt, dat nom System Bronze, Sëlwer, Gold. Dat wier eng Reaktioun op d'Konkurrenz vun de privaten Assureuren.

Wat eng permanent Kooperatioun mat der Air Rescue ugeet, do sot den Invité vun der Redaktioun:

Gespréicher hätt et ginn, et ass awer Näischt draus ginn. D'Air Rescue géif nëmme Rapatriementer ubidden, sou de Fabio Secci weider. D'CMCM awer och nach de ganze medezineschen Deel ronderëm. Et muss een also net Member an der Air Rescue sinn, fir am Ausland gehollef ze kréien, respektiv heem bruecht ze ginn.

D'CMCM géif awer aus deontologesche Grënn keng grouss Reklamm domadder maachen, sou nach den CMCM-Generaldirekter.

Invité vun der Redaktioun: Fabio Secci

Rendez-vous fir den Interview mam Invité vun der Redaktioun all Dag vu méindes bis donneschdes um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.