E Mëttwoch de Moie war den CSV-Deputéierten eisen Invité vun der Redaktioun.

D'CSV an d'Chamber sti ganz kloer zu der Onofhängegkeet vun der Justiz an och zum Prinzip vun der Gewaltentrennung. Dat sot um Mëttwoch de Moien den CSV-Deputéierte Léon Gloden. Hie war eisen Invité vun der Redaktioun.

Hien huet op Aussoe vun der Procureur Général Martine Solovieff leschte Samschdeg an eiser Emissioun Background reagéiert. Déi sot sech ganz iwwerrascht iwwert den CSV-Politiker, an datt de Saz „de Parquet ass onofhängeg“ lo awer net an eng nei Verfassung dra soll stoe kommen, obwuel et an engem viregten Text anescht war.

Mir sinn an engem anere Kader, seet de Léon Gloden. Virdrun hu mer un enger neier Verfassung geschafft, elo geet et ëm eng punktuell Upassung. Am Justizkapitel gouf nogebessert an et gëtt en Accord op deem Punkt.

Dem CSV-Deputéierten no, géif et elo, an der Meenungsverschiddenheet tëscht Parquet an CSV, net ëm d'Onofhängegkeet vun der Justiz goen, mä wat ass d'Roll vum Parquet? Do huet d'CSV eng aner politesch Vue wéi d'Procureur Général. De Parquet wär en Deel vun der Justiz, haut géif de Parquet kloer ënnert der Autoritéit vum Justizministère stoen. Och an de Gesetzer géif dra stoen, datt de Justizminister kéint intervenéieren, fir Infraktiounen ze denoncéieren.

Et géif net drëms goe sech an e lafende Prozess anzemëschen.

De Léon Gloden gesäit de Bréif virun e puer Méint vun der Procureur Général un de Chamberpresident Fernand Etgen als Amëschung an déi legislativ Aarbecht. Datt d'Martine Solovieff dee Bréif nach eemol géif maachen, erstaunt den CSV-Deputéierten. D'Procureur général an de President vun der Cour supérieure de justice hate sech do iwwert ze vill parlamentaresch Froen an der Affär vun de Police- a Justizfichiere beschwéiert.

D'CSV huet och elo e Bréif un de Chamberpresident gemaach, fir sech ze beschwéieren a freet, datt d'Aussoe vun der Procureur am Chamberbüro diskutéiert ginn.

Invité vun der Redaktioun: Léon Gloden

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.