D'Procureur Général war eis Invitée dëse Samschdeg an der Emissioun "Background am Gespréich".

Background am Gespréich mam Martine Solovieff

Et muss ee sech Froe stellen, ob d'Politiker d'Separation des Pouvoirs och wierklech wëllen an der Verfassung verankeren oder net. Dëse Constat huet d'Procureur Général d'Etat e Samschdeg de Mëtteg op eiser Antenne gemaach.

Datt den Artikel 99 vun der neier Verfassung no laangem Konsens elo op eemol no 11 Joer soll ofgeännert ginn an datt den Zousaz entfält, datt de Parquet "onofhängeg" a sengen Funktiounen ass, fënnt d'Martine Solovieff erstaunlech.

Entspriechend Erklärunge vum CSV-Co-Rapporter Léon Gloden dës Woch huet d'Madamm Solovieff als iwwerraschend bezeechent. Mam aktuellen Text, dee sou vun der Chamberkommissioun fixéiert gouf, géif een zum Beispill hannert de belsche Standarden grad wéi de Recommandatiounen vum GRECO zeréckbleiwen. Och d'Konkordanz mat den Texter iwwert den neie Conseil national de la Justice mat sengen 9 Membere wier duerch dës Ännerung net ginn.

Extrait Martine Solovieff (1)

Filmfong

Op de Bréif ugeschwat, deen den Duo Solovieff-Wiwinius am Summer un de Chamberpresident geschéckt huet, wier nëmme fir eng eenzeg parlamentaresch Fro viséiert gewiescht - ee Bréif, deen d'Martine Solovieff och haut nach emol esou géif verfaassen, well hir Integritéit a Fro gestallt gi wier.

Och den deemolege Justizminister Felix Braz wier immens opbruecht gewiescht iwwert dës spezifesch Fro an hätt souguer eng Demissioun an d'Spill bruecht.

Extrait Martine Solovieff (2)

E Bréif, deen d'Procureur Général d'Etat am Kader vun enger Denonciatioun un de Felix Eischen am Dossier Filmfong adresséiert hat, wier verfaasst ginn, fir eng méiglech "origine douteuse" vun de Sourcen ze hannerfroen, sou d'Martine Solovieff.

Extrait Martine Solovieff (3)

Honorabilitéit-Certificaten

Wat d'Ausstellen vun Honorabilitéit-Certificaten ugeet, zum Beispill fir Leit, déi bei Sécherheetsfirme schaffen oder fir een, deen e Waffeschäin freet, sou gëtt mat Schmäerz op e gesetzlecht Nobesseren vun der Legalitéit vun der Jucha-Datebank beim Parquet gewaart.

Police Judicaire

D'Prozeduren bannent der Police Judiciaire bezeechent d'Martine Solovieff als laangwiereg a komplex, och géif d'Police-Reform vun 2018 nach net richteg gräifen. D'Rapiditéit vun den Enquêtë vun der PJ wier allemol net eropgaangen. De politesche Wëlle wier awer do, fir massiv ze rekrutéieren. Besonnesch am Departement vun de neien Technologien géifen akut Leit feelen. Déi aktuell Delaie vun 7 Méint fir zum Beispill Handy- oder PC-Donnéeën auszewäerten, wieren een "Desaster" an net ze justifiéieren.

Gewalt um Haff

Och op eng Enquête iwwert Aussoe vum Journalist Pol Schock am RTL-Presseclub iwwert physesch Gewalt um Haff gouf d'Procureur Générale ugeschwat. Dozou sot si, datt wann een esou Saache géing héieren, een och der Saach misst nogoen. Wann esou eppes bis public wär, da wär et d'Missioun et eventuell an d'Enquête ze ginn. An dat wär an deem Fall jo och geschitt, sou d'Martine Solovieff.

Extrait Martine Solovieff (4)

Berufflech Zukunft

Mat 62 Joer kéint d'Martine Solovieff iwwerdeem nach 6 Joer op hirem Poste bleiwen. Virun deem Datum géif si wuel awer de Posten zur Dispositioun stellen, wëll d'Charge eng wier, déi Een immens vill géif fuerderen.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.