E Mëttwoch war de President vun der Cour Supérieure de Justice den Invité vun der Redaktioun.

Wéi soll den neie Justizrot ausgesinn? De President vun der Cour Supérieure de Justice Jean-Claude Wiwinius begréisst op alle Fal eng Kritik, déi de Staatsrot am Avis zum Text formuléiert.

De Jean-Claude Wiwinius war e Mëttwoch de Moien den Invité vun der Redaktioun.

Ee ganz wichtege Punkt wier nämlech d'Nominatioun vun alle Magistraten. An Zukunft soll den neie „Conseil de la justice“ déi proposéieren, de Staatschef nominéiert se, mä dee kann dat refuséieren, sou gesäit den Text et op d'mannst vir.

Dat heescht konkret, datt de Justizminister net dee misst huelen, deen den neie Conseil proposéiert, bedauert de Jean-Claude Wiwinius, dee frou ass, datt och de Staatsrot dat net esou wëll duerchgoe loossen.

A grousse Linne wier een awer d'Accord mat deem, wat geplangt ass.

An enger iwwerschaffte Verfassung soll net dra stoe kommen, datt de Parquet onofhängeg ass. De Jean-Claude Wiwinius sot sech iwwerrascht iwwer de politesche Revirement. Hie wollt dat awer net weider kommentéieren. De Staatsrot hätt jo och gesot, datt deen nach wéilt en Avis maachen.

Zejoert hat e Bréif fir vill Opreegung gesuergt. D'Procureure générale d'Etat Martine Solovieff an de President vun der Cour Supérierure Jean-Claude Wiwinius haten um Bord vun der Casiers-Affär dem Chamberpresident Fernand Etgen geschriwwen.

Ob hien dat nach eng Kéier géing maache wollt hien net kommentéieren. Hie wéilt elo net weider Ueleg an d'Feier schëdden. Et wier am Gaang eng Blimmche vun Harmonie ze wuessen an hie géing déi net futti trëppelen.

Et wier scho villes geschitt an d'Justiz géing weider intensiv dru schaffe fir méi transparent ze ginn.

Et géing ee maache wat ee kéint, natierlech kéint bei der Justiz net alles op d'place publique kommen, sou nach de Jean-Claude Wiwinius.

Invité vun der Redaktioun: Jean-Claude Wiwinius

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.