E Freideg de Moie war den Educatiounsminister eisen Invité vun der Redaktioun.

Mir hunn eng aussergewéinlech Situatioun, mä mir hunn awer och en aussergewéinlechen Asaz vun de Leit. Dat sot den Educatiounsminister Claude Meisch e Freideg de Moien iwwert d'Schoul doheem. Hie war eisen Invité vun der Redaktioun. Et géing een alles dru sëtzen, datt all Schüler d'nächst Schouljoer propper an nei ufänken kéint.

Dat et net evident wier, datt d'Wëssen an dëser Krisephas doheem muss vermëttelt ginn, ass sech den Educatiounsminister bewosst, hie betount awer och, datt ee sech net geckeg sollt maachen, mä dat bescht méiglechst aus der Situatioun erauszéien:

"Mir kënnen d'Perfektioun do net areechen, mä mer kënnen et awer gutt maachen fir d'Kanner, datt awer eppes hänke bleift, se sech weider entwéckelen an nei Contenue kënne vermëttelt kréien."

E Kritikpunkt vun de Schüler an Elteren war et, datt et un engem eenheetleche System géif feelen. De Claude Meisch mengt awer, datt antëscht d'Leit op eppes agestallt wieren:

"An ech mengen, et wier de gréissten Feeler dee mer elo kéinte maachen, wa mer géinge soen, et dierf just nach dat dote sinn! Ech mengen, da géinge mer jiddweree geckeg maachen erëm vun Ufank un."

Vun deem Moment un, wou d'regulär Schoul rëm lafe géing, wieren och Mesuren virgesinn, fir sou vill wéi méiglech aus de leschte Woche kënne erauszezéien. Zum Beispill andeems d'Uni-Studenten, déi Schoulmeeschter oder Léierin wëlle ginn, dann hire Stage, dee se elo net kënne maachen, nohuelen. Dat wieren op d'mannst 300 déi disponibel wieren:

"Mir wäerten deenen awer och alleguer e Contrat à durée déterminé ubidden, bis Enn vum Schouljoer, fir datt se kënnen do bleiwen an d'Enseignanten ënnerstëtzen, fir ze differenzéieren, fir Appui ze halen, fir dat och mat Zäit kënnen opzeschaffen, wat vläicht dann elo deem eng oder aneren e bëssen verluer gaangen ass."

Wat d'Premiersexamen uginn, do ass den Educatiounsminister zouversiichtlech datt déi wäerte sinn:

"Souguer wa mer och den 25. Mee zou wieren an de Schoulen, kënne mer dat awer organiséieren, well da stinn d'Schoulen eidel a mir hunn och ganz vill Personal, wat disponibel ass fir Surveillance ze halen. Dat heescht mer kënne déi ganz Surfacen vun de Schoulen notzen. An och wann nëmmen 3 oder 4 Primaner an all Sall sëtzen, kënne mer dat souwuel ënner fairen Bedéngunge fir de Schüler organiséieren, wéi awer och ënner korrekte sanitäre Bedéngungen."

Adaptatiounen, wat d'grouss Vakanz betreffen, gesäit de Claude Meisch à ce stade net als noutwenneg. Hien huet nach betount, datt nämmlecht wéi elo mat der Ouschtervakanz, all Concernéiert dës Auszäit bräichten.

Den Educatiounsminister Claude Meisch hat en Donneschdeg erkläert, dass et no der Ouschtervakanz an der Schoul weidergeet. Erkläerten Zil ass et, fir ze garantéieren, datt all Schüler dëst Schouljoer propper ofschléisse kann.

Invité vun der Redaktioun: Claude Meisch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.