En Dënschdeg de Moie war den DP-Fraktiounschef eisen Invité vun der Redaktioun.

Loosst sozial Interaktiounen sinn, déi net musse sinn. Dat war den Haaptmessage vum DP-Fraktiounschef Gilles Baum en Dënschdeg de Moien hei op RTL. Seng Partei, sou ewéi déi aner Regierungsparteien LSAP an déi Gréng, wäerten e Mëttwoch déi nei Restriktiounen wéinst dem Covid unhuelen, eent zu eent sou ewéi d’Regierung se proposéiert huet, dëst viraussiichtlech emol bis de 15. Dezember.

D'Chamber wier vun Ufank u mat an d'Ausschaffe vun de Mesuren mat agebonnen ginn, huet den DP-Fraktiounschef awer betount. Zur Kritik, d’Mesuren hätte keng wëssenschaftlech Basis, huet de Gilles Baum geäntwert: „Dach!“ D’Deputéiert hätten eng Note vun der Taskforce kritt, wou kloer drop steet, wéi d’Situatioun aktuell wier a wat ze maache wier.

Op d’Fro, ob ee wéisst wat déi eng oder aner Mesure bréngt war et d’Äntwert: „Dat do ass alles Kaffissazmolerei.“ Hie kéint net soe wat et bréngt, mä hie kéint soen, datt wann een „um héije Level“ un Neiinfektioune bleift, da kéint et „ganz dramatesch“ ginn, fir Leit, déi an d’Intensivstatioun ageliwwert musse ginn.

De Gilles Baum sot hie wier sech bewosst, datt een ni e Covid-Gesetz wäert hikréien, dat unanime an der Chamber an an der Gesellschaft ugeholl gëtt. D'Majoritéit misst awer Responsabilitéit iwwerhuelen, fir d'Spideeler ze entlaaschten.

Datt d’Familljen- a Groussregiounsministesch Corinne Cahen virun 10 Deeg e Reportage vun TF1 mam Titel „pays epargné par le deconfinement“ op Twitter gedeelt huet, wier guer net onglécklech, sou de Gilles Baum. Vläicht wier et net de beschte Moment gewiescht fir Reklamm ze maachen, huet en zouginn. Mä et wier net dacks, datt d’Fransouse positiv iwwert Lëtzebuerg berichten a wa se et maachen, da soll een dovunner profitéieren.

Invité vun der Redaktioun: Gilles Baum

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.