En Donneschdeg de Moie war den CSV-Deputéierten a Stater Schäffen eisen Invité vun der Redaktioun.

Dat Ganzt ass net gutt, well eis Aarbecht fir d’Matmënschen net am Mëttelpunkt steet. Dat sot den CSV-Deputéierte Serge Wilmes en Donneschdeg de Moien iwwer d’Polemik, déi de Parteichef Frank Engel reegelméisseg ausléisst.
D’Fro, ob den Här Engel als President nach "tragbar" wier, huet en net beäntwert. Jidderee sollt mol fir sech decidéieren, ob e wéilt President ginn. Nach huet de Frank Engel dat net confirméiert. Keen hätt sech bis ewell manifestéiert. Wale wären och keng Schwächt. D’Delegéiert géifen dann de 24. Abrëll um Kongress decidéieren.
Et soll een ni „ni“ soen am Liewen, sot de Serge Wilmes, mä hie geet awer haut dovunner aus, datt hien elo net kandidéiert. Hie wéilt sech op seng zwee Mandater, 1. Schäffe vun der Stad Lëtzebuerg an Deputéierten, konzentréieren.

Spëtzekandidat Nationalwalen 2023

2023 wëll hien d’CSV-Stad als Spëtzekandidat an d’Gemengewale féieren.
Et ass gewënscht, souwuel vu Parteimembere, wéi och vu de Politiker selwer, fir no baussen als Ekippen unzetrieden. An dat wär och dem Martine Hansen säi Féierungsstil, nämlech an der Ekipp kollektiv zesummenzeschaffen, an nieft sech och aner Deputéiert z'erlaben, déi a verschiddenen Debatten hir Akzenter kënne setzen. Dat wär eng Stäerkt, an dat misst een elo och op de kompletten Niveau vun der Partei transposéieren... eng Zesummenaarbecht tëscht der Spëtzt vun der Partei, der Fraktioun an all de gewielte Gemengepolitiker.

Iwwer déi national Spëtzekandidatur sollt een, wann de Moment do wier, oppen a kreativ intern diskutéieren. Déi éischt Echeancë wären elo mol d'Gemengewalen an dann d'Nationalwalen. An dann, wann d'Diskussioun iwwer Spëtzekandidate lancéiert gëtt, misst ee sech och d'Fro stellen, ob et Sënn mécht, mat engem Spëtzekandidat an d'Walen ze goen, oder fir all Bezierk ee Spëtzekandidat oder souguer Duebelspëtzten, sou de Serge Wilmes.

Wat d'Gemengewalen ugeet, do géing hien natierlech als éischten CSV-Schäffe vun der Stad Lëtzebuerg, d'CSV Stad als Spëtzekandidat an d'Wale féieren. Et wären nach 2 an een halleft Joer bis dohin, wou nach vill misst geschafft ginn.

Schlecht Relatiounen tëscht der Stad Lëtzebuerg an dem Staat

D'Relatiounen tëscht der Stad Lëtzebuerg an dem Staat si schlecht, soss hätt d'Gemeng net missen op den Asaz vun enger privater Sécherheetsfirma zeréckgräifen, fir d'Sécherheetsgefill am Stater Quartier an zu Bouneweg ze stäerken. Et géing ee voll a ganz hannert der Police stoen an et wéilt een och, dass se genuch Ressourcë kréichen an och legal Moyenen, fir fir Sécherheetsgefill ze suergen. Fakt wär awer, dass d'Police Moyenen net hätt an doduerch och laang näischt geschitt wär um Terrain, sou eisen Invité. An dat trotz dem Fait, dass Awunner iwwer Joren ëmmer nees no Hëllef gefrot hätten.
Et wier eng Polemik, déi net vun der Stad Lëtzebuerg ausgeléist wär, mä vum Policeminister, an dat hätt ee sech wierklech net gewënscht, esou de Serge Wilmes. Et wär net d'Zil, fir sech mam Policeminister kritesch auserneen ze setzen. An dofir ass et nach eemol den Appell vum Schäffen un de Minister, fir d'Hand unzehuelen, déi d'Stad Lëtzebuerg géing ausstrecken, fir zesumme mat all den Acteuren de Problem unzegoen.

Invité vun der Redaktioun: Serge Wilmes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.