E Méindeg de Moie war de fréiere President vun der Autosassociatioun ADAL eisen Invité vun der Redaktioun.

Den Autosfestival dëst Joer war e rationellt Evenement mat manner Trafic an de Garagen. Déi Leit, déi koumen, ware virdrun informéiert a si koume fir ze kafen. Dat sot den Ed Goedert, fréieren Direkter vun Autopolis a fréiere President vun enger Autosfederatioun. Hie war e Méindeg de Moien den Invité vun der Redaktioun.

Am Trend läit weiderhin den SUV, och de Privat-Leasing wier e Modell, deen um Komme wier. Besonnesch am Moment géing de Leasing eng gewëss Planungssécherheet bréngen, well een net wéisst, wat a 5 Joer um Autosmarché ass.
Fir den Ed Goedert ass et kloer, datt d'Elektromobilitéit grad hiren Duerchbroch feiert. D'Modeller wiere méi accessibel ginn. Déi staatlech Primme géingen natierlech hiren Deel dozou bäidroen.
Allgemeng géif et e Paradigmewiessel ginn. Bei de Jonken hätt den Auto net méi dee Stellewäert an dat wier gutt, sou den Ed Goedert.

D'Accisen an d'CO2-Steier maachen de Sprit méi deier. Datt den Automobilist awer lo d'Mëllechkou vun der Natioun wier, dat gesäit den Ed Goedert net esou. Politesch gesi misst do e gudde Mëttelwee fonnt ginn. An eisen Nopeschlänner wieren d'Taxe méi héich wéi bei eis.

E Garage, dee gutt funktionéiert, géing och gutt Personal fannen. Natierlech misste gutt Mataarbechter och adequat bezuelt ginn. Als Garagist misst een dem Client dofir vläicht och méi verrechne wéi dat am Moment de Fall ass.
Wéi iwwerall géingen och um Lëtzebuerger Marché ëmmer méi grouss Gruppen agéieren. Datt de klenge Garagist ganz wäert ausstierwen, dat gleeft den Ed Goedert awer net.

Invité vun der Redaktioun: Ed Goedert

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.