En Donneschdeg war de CEO vu Luxairport eisen Invité vun der Redaktioun.

Eng 30-40 Flich mat ronn 4.000 Passagéier goufen et en Vue vun der Ouschtervakanz. Dat ass ongeféier 25% vun der Zuel aus dem Referenzjoer 2019, wou et ëm Ouschtere 16.000 Passagéier um Findel gouf. Dat sot de CEO vu Luxaiport, de René Steinhaus, en Donneschdeg de Moien als eisen Invité vun der Redaktioun.

Dat meescht ware Vakanzeflich. Geschäftsreese géifen et der weiderhi kaum ginn, woubäi een awer dervun ausgeet, datt sech déi Situatioun och no der Kris nees géif normaliséieren, wann och op engem manner héijen Niveau.

E puer honnert Leit hätte sech dann och am Testzenter um Findel d’lescht Woch teste gelooss.

Datt déi virgeschriwwen, negativ Covid-Tester net ëmmer géife kontrolléiert ginn, géif dem René Steinhaus no net stëmmen. D’Airlines wieren hei an der Responsabilitéit a géifen dat och ganz genee huelen. Wann et Fäll ginn hätt, wou dat net geschitt wier, wieren dat Eenzelfäll, zu deenen hien den Ament näischt Geneeës kéint soen. Fir de Chef vu Luxairport ass et kloer, datt Fléien dat sécherst Verkéiersmëttel ass – och a Coronazäiten. An d’Leit wéilten nees reesen.

Zejoert gouf et am Verglach mat 2019 1/3 vun de Passagéier, beim Cargo awer e Plus vu 6%. Laang kéint een an der Fluchbranche net esou weider maachen. Swiss a Britisch Airways hu sech an der Kris vum Findel zeréckgezunn a si bis ewell nach net zeréckkomm.

Et hofft ee ganz staark op déi zweet Hallschent vun 2021, datt Testen an Impfen nees méi Fräiheete bréngt. 50 bis 60% vum Joresresultat vun 2019 peilt ee fir dëst Joer un, esou de René Steinhaus.

Invité vun der Redaktioun: René Steinhaus

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.