En Dënschdeg war de CEO vun der Bourse eisen Invité vun der Redaktioun.

D’nohalteg Finanz wäert déi eenzeg Form vu Finanz vun der Zukunft sinn. Där Iwwerzeegung ass de Robert Scharfe, de CEO vun der Lëtzebuerger Bourse, deen d’nächst Woch an d’Pensioun geet. Hie sot um Dënschdeg de Moien hei op RTL, all d’Acteuren op der Finanzplaz hätten nach Méiglechkeeten, fir sech an deem Domän weider z’entwéckelen, notamment am Beräich vun der Nohaltegkeet. Dem Robert Scharfe no wier dat och eng „enorm Chance“ a vläicht misst een „nach e bësse méi couragéis sinn.“

D’Luxembourg Stock Exchange hätt am Beräich vun der grénger Finanz, dem Robert Scharfe no eng weltwäit Part de marché vun iwwer 50%. De Chef vun der Lëtzebuerger Bourse wollt och de Reproche vu Greenwashing net ganz gëlle loossen. Datt ënnert de Firmen, déi gréng Obligatiounen op der Lëtzebuerger Bourse erausginn, Firme sinn, déi nach haaptsächlech an der fossiller Energie aktiv sinn, misst een „differenzéiert“ gesinn. Eng Gesellschaft kéint verschidden Aktivitéiten hunn an awer a ganz gréng Projete finanzéieren, esou de Robert Scharfe. Et wier de Projet, deen op d’Lëtzebuerger Bourse kënnt an net d’Firma als Ganzt.

Den Trend wier dem Robert Scharfe no och deen, datt Gesellschafte sech kloer musse positionéieren. Dat wier net vum éischten Dag u perfekt, mä et wier eng Transitioun, déi ee misst „encouragéieren“, soss géing een d’Klimaziler ganz sécher net erreechen. Méi wéi een Drëttel vun de 5.000 Milliarden Euro, déi a Lëtzebuerger Fonge geréiert ginn, géingen iwweregens aktuell schonn am grénge Beräich stiechen. An deen Undeel géing „ganz rapid“ wuessen.

Als ee vun de gréisste Problemer fir d’Finanzplaz gesäit de Robert Scharfe d’Sich no Nowuess an Talenter. Et wier nämlech méi schwiereg ginn, fir jonk Leit fir d’Finanz z’interesséieren, „et sief dann et weist een, datt nohalteg Investissementer genau de Moyen sinn, fir eben eng besser Ëmwelt, e bessere Klima, eng besser Gesellschaft ze kreéieren“. Deen Nowuess misst een vill méi konsequent entwéckelen, notamment mat der Universitéit, sou nach de Robert Scharfe.

Fir seng Successioun un de Spëtzt vun der Bourse gouf awer Nowuess fonnt. D’Julie Becker gëtt den 21. Abrëll CEO vun der Luxembourg Stock Exchange.

Invité vun der Redaktioun: Robert Scharfe

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.