En Dënschdeg de Moie war d’Sousdirektesch vun der Santé eis Invitée vun der Redaktioun.

Mam neien Observatoire de la santé kéint een d’Relatioun tëscht der Gesondheet an der Gesondheetspolitik besser beliichten, sou d’Sousdirektesch vun der Santé, d’Françoise Berthet.

Den zukünftegen Observatoire de la santé soll d’Donnéen déi zur Verfügung stinn zesummebréngen an dorausser Analysen zéien, sou d’Françoise Berthet en Dënschdeg de Moien hei op RTL. D’Chamber huet deen Observatoire am Februar eestëmmeg guttgeheescht an d’Françoise Berthet ass elo beoptraagt, fir deen op d’Been ze setzen. Si huet erkläert, datt déi aktuell Analysen iwwert d’Relatioun tëscht der Gesondheet vun de Leit an d’Ressourcen déi disponibel sinn, géinge just „partiell“ gemaach ginn. Den Observatoire soll méi „Wëssen a Liicht“ bréngen. D’Rapporten an d’Konklusioune géingen och verëffentlecht ginn. Ugeschwat op de Rapport „Lair“ iwwert den Etat des lieux vun de medezinesche Beruffer sot d’Françoise Berthet "natierlech ka scho vill Aarbecht op Basis vun deem Rapport gemaach ginn, mee dee Rapport huet och gewisen, datt besser Donnéeën néideg wieren fir d’Problematik vun der Demographie ganz ze beliichten".

Carte sanitaire Ufanks 2022
Am Zesummenhang mat der Covidkris huet d’Françoise Berthet och op d’Kritik vun der ADR reagéiert, datt d’Zuel vun de Spidolsbetter erofgesat gi wier. „Dat kann een net wierklech soen“, sou d’Sousdirektesch vun der Santé. D’Autorisatioune fir d’Spideeler wieren op Basis vun der „carte sanitaire“ erausgaangen. Den Observatoire de la santé wäert iwweregens vun dësem Summer un d’Aktualisatioun vun där Kaart ausschaffen. Ufanks 2022 soll se fäerdeg sinn.

Vaccin: Kee Signal fir laangfristeg Effekter
Wat d’Impfcampagne ugeet, sot d‘Françoise Berthet et géing effektiv ëmmer Skeptiker ginn, well déi d’Benefisser vun der Impfung fir sech an duerno fir déi aner net géinge gesinn. Allerdéngs géingen d’Donnéeë confirméieren, datt mat all Prozent vun der Populatioun deen ee méi impft, Infektiounen, Hospitalisatiounen an Doudesfäll kéinte verhënnert ginn. Wann d’Hallschent vun der Populatioun geimpft wier, kéint een 30 bis 40% vun den Infektiounen a 60 bis 70% vun den Hospitalisatioune verhënneren. Laangfristeg Niewewierkungen kéint een zwar nach net aschätzen, sou d’Françoise Berthet. Allerdéngs géing et mat all dem Wëssen, dat een zanter Ufank vun der Impfcampagne gesammelt hätt a mat den honnerte Milliounen u Leit déi geimpft goufen, „kee Signal“ ginn, datt ee misst laangfristeg Effekter fäerten.

Invité vun der Redaktioun: Françoise Berthet

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.