E Mëttwoch de Moie war de Kommissär fir d'Lëtzebuerger Sprooch eisen Invité vun der Redaktioun.

D'Sprooch ass e groussen Deel vun eiser Identitéit. D'Lëtzebuergescht, awer och d'Méisproochegkeet, géife Lëtzebuerg ausmaachen. Dat sot de Marc Barthelemy am RTL-Interview. De Kommissär fir d'Lëtzebuerger Sprooch war eisen Invité vun der Redaktioun.

Lëtzebuerg wär ëmmer méisproocheg gewiescht, mä dat hätt dem Lëtzebuergeschen net geschuet. Et hätten nach ni esou vill Leit Lëtzebuergesch kënne schwätzen. Och wann den Undeel vu Mammesproochler erofgaangen ass, well d'Populatioun sech gréisstendeels mat Awanderer quasi verduebelt huet.

Lëtzebuergesch hätt awer immens a puncto Statut gewonnen, zum Beispill gëtt et an der Chamber oder op Nationalfeierdag geschwat, wat viru 40 Joer bei sou offizielle Geleeënheeten net de Fall gewiescht wier.

D'Demande, fir Lëtzebuergesch als Friemsprooch ze léieren, wier ganz grouss. Och wa vill Efforte gemaach gi sinn, géif een der Demande bal net nokommen. Nach dëst Joer soll en Internetcours kommen, wou ee – gratis - vun iwwerall op der Welt aus ka Lëtzebuergesch léieren.

Invité vun der Redaktioun: Marc Barthelemy

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.