E Freideg de Moie war de President vun der CNS eisen Invité vun der Redaktioun.

D'nächst Joer - warscheinlech awer réischt  fir de Summer - soll de sougenannten "Paiement immédiat direct" kommen. Dat heescht, et muss een näischt méi bei den Dokteschrechnunge virstrecken an direkt just nach dat bezuelen, wat d'Keess net iwwerhëlt. Dat wär déi grouss Prioritéit fir d'Gesondheetskeess d'nächst Joer, sou de Christian Oberlé, President vun der CNS. Hie war e Freideg de Moien eisen Invité vun der Redaktioun. Et géif da sécher seng Zäit brauchen, bis d'Leit den neie System unhuelen. Mä de "Paiement immédiat direct" hätt sou vill Avantagë fir d'Leit an och fir d'Dokteren, datt dat sech géif duerchsetzen.

Aktuell dauert et nach bis zu 6 Wochen, bis ee seng Rechnung zréckbezuelt kritt. Leit, déi hir Rechnung digital eraginn, kréien d'Suen an nëmmen 3 bis 4 Deeg. Mä dat wär nach net bekannt genuch, huet de Christian Oberlé bedauert. Am Digitale wieren nach grouss Efforten néideg.

Och bei der Notzung vum elektroneschen Patientendossier, dem "dossier de soins partagés". Dëse medezineschen Outil kéint nëmme funktionéieren, wann e vun de Professionelle genotzt géif, sou den CNS-President, deen och President vun der Agence e-Santé ass. Déi géife scheinbar awer Zäit brauchen, fir den Notzen dovunner ze gesinn.

Fir hie wier et allzäit kloer, datt d'Digitaliséierung méi Envergurë misst kréien, sou de Christian Oberlé. D'Digitaliséierung wier och eng vun den Haaptpiste fir d'Käschtenevolutioun an de Grëff ze kréien. Der CNS lafen ablécklech d'Onkäschten dervun. Fir d'nächst Joer gëtt mat engem Minus vun 10 Milliounen Euro gerechent.

IRM Potaschbierg: CNS waart op leschten Accord vum CHL, fir d'Rechnungen ze rembourséieren

D’IRMen, déi am medezineschen Zenter um Potaschbierg gemaach ginn, wäerte geschwë réckwierkend rembourséiert ginn, huet de Christian Oberlé erkläert. Et gëtt jo en Accord tëscht dem CHL an dem medezineschen Zenter zu Maacher, a soubal deen duerch déi lescht Instanz ass, Ugangs Dezember, wäert zréckbezuelt ginn. Wéi vill Rechnunge vum Potaschbierg opstinn, konnt de Christian Oberlé net soen.

Psychotherapie: Mediateur dierft an enger décker Woch Konklusiounen zéien

D'Psychotherapie soll och geschwë rembourséiert ginn. En Donneschdeg war eng lescht Reunioun an der Mediatioun tëscht der Gesondheetskeess an de Vertrieder vun de Psychotherapeute vun der Fapsylux. D'CNS hätt nach eng Kéier en Effort gemaach an e bëssen nogebessert bei den Tariffer, sou eisen Invité. Awer just bis e gewëssenen Niveau an d'CNS ass d'accord, fir no zwee Joer eng Evaluatioun ze maachen. Et wéisst een awer net, wéi d'Fapsylux sech an der Mediatioun positionéiert huet. Eng Decisioun, wéi et elo weider geet, dierften de Mediateur an den zoustännege Minister ganz geschwënn huelen. CNS a Fapsylux waarden elo op eng Konklusioun vum Mediateur op Basis vun den Diskussiounen. Et wär op alle Fall kloer, datt d'CNS de Remboursement wéilt. Et sollt net un der Gesondheetskeess hänken, datt et sou laang dauert.

Invité vun der Redaktioun: Christian Oberlé

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.