En Donneschdeg de Moie waren d'Aarbechtsrecht an d'Rentendebatt Thema an der Emissioun "Invité vun der Redaktioun".

Invité vun der Redaktioun: Jean-Paul Olinger

Bis e Mëttwoch hu scho 17.000 Leit hir Steiererklärung fir 2024 gemaach, dat sot den Direkter vun der Steierverwaltung, de Jean-Paul Olinger en Donneschdeg de Moien als eisen Invité vun der Redaktioun, um RTL-Steierdag. Iwwer 11.000 Leit hunn dofir den Online-Assistent genotzt. Dat geet iwwer myGuichet.lu, ass méi séier a manner ufälleg fir Feeler. A bannent 2 Woche kritt ee seng Besteierung, also eventuell Suen zréck.

Mam Assistent dauert d’Steiererklärung déi 1. Kéier ronn eng Stonn oder souguer manner. Wann ëmmer méi Saache "vir-ausgefëllt" sinn, dauert et dono just eng hallef Stonn, oder souguer Minutten, sou de Jean-Paul Olinger.

Zil ass et, datt bis 2028 85% vun de Steiererklärunge mam Assistent gemaach ginn. Aktuell ginn nach 80% op Pabeier ausgefëllt, 10% iwwer PDF a just 10% profitéiere vum elektroneschen Assistent. Wann ee klassesch seng Steiererklärung mécht, dauert et méi laang, dat heescht Wochen oder souguer e puer Méint, bis een eng Äntwert huet. Besonnesch wann een d’Steiererklärung um Enn vum Joer mécht, wa méi Undrang ass. D'Pabeier-Méiglechkeet wäert awer och déi nächst Jore bestoe bleiwen.

Wat d’Moderniséierung vun der Steierverwaltung ugeet, kéim ee gutt virun. Et wier e Prozess, deen iwwer Jore geet, erkläert den Direkter. Et wier een amgaangen, en neien Internetsite ze schafen an en Chat-Bot, fir de Kontakt mat de Leit méi einfach ze maachen an en neien Informatiksystem ass néideg, well aktuell mat vereelzte Systemer geschafft gëtt.

Bei der Steierverwaltung schaffen iwwer 1.100 Leit a 70 Servicer a 24 Gebaier. Si këmmere sech ëm iwwer 355.000 Dossiere vu Privatleit a ronn 122.000 vu Betriber. A suergen derfir, datt 14 Milliarden Euro d'Joer era kommen.

LIVESTREAM Radio

Rendez-vous fir den Interview mam Invité vun der Redaktioun all Dag vu méindes bis freides um 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.