No 22 intensive Courssen ass d'Formel 1 e Sonndeg mat der 19. Victoire vum Max Verstappen op en Enn gaangen.

Beim Grousse Präis vun Abu Dhabi stoung virun allem awer nach eng grouss Decisioun op, an zwar wie Vizeweltmeeschter bei de Konstrukteure gëtt. Um Enn huet Mercedes sech mat 3 Punkten Avance op Ferrari déi zweet Plaz geséchert.

Am virtuelle Klassement am Laf vun der Course huet de Vizeweltmeeschter ëmmer nees changéiert. Eng Kéier war Mercedes mat senge Piloten George Russell a Lewis Hamilton vir, dann nees Ferrari mam Charles Leclerc a Carlos Sainz. Den RTL-Formel-1-Expert Dominique Riefstahl fënnt, datt et eng ganz wierdeg Saison-Finall war.

D'Formel 1 Saison ass eriwwer / Franky Hippert

Hanner Red Bull ass Mercedes also Vizeweltmeeschter. Ee Mann hat awer e Sonndeg net nëmmen d'Course nees fest am Grëff, mä huet schonn déi lescht 8 Méint d'Konkurrenz dominéiert. Den Team-Chef vun Aston Martin Mike Krack zitt säin Hutt virun der Leeschtung vum Red Bull-Pilot Max Verstappen.

De Max Verstappen huet e Sonndeg seng 19. Course an der Saison gewonnen, dat ass Rekord. Iwwerhaapt ass et d'Joer vun de Rekorde fir den dräifache Weltmeeschter a seng Ecurie.

Formel 1 Bilan 2023/Reportage Franky Hippert

Nieft deenen 19 Courssen an enger Saison, déi neie Rekord sinn, huet de Max Verstappen och 10 Courssen um Stéck gewonnen, war bei 1.003 vun 1.383 Ronne vir, huet 575 vu 620 Punkten gesammelt an huet mat 290 Punkten op de Vizeweltmeeschter, säin Equipier Sergio Perez, dee gréissten Ecart, deen et tëscht deenen zwee Éischten am Schlussklassement gouf.

D'Ecurie Red Bull huet och 21 vun deenen 22 Coursse vun der Saison gewonnen an 860 vun 1.058 méigleche Punkten agefuer. Aston Martin kënnt am Schlussklassement hannert Red Bull, Mercedes, Ferrari a McLaren op déi 5. Plaz bei de Konstrukteuren. De Fernando Alonso stoung am Ufank bei 6 vun deenen 8 éischte Courssen um Podium, um Enn vun der Saison aachtmol.

D'Formel-1-Supporter mussen elo 13 Weekender ouni d'Kinneksklass aus dem Automobilsport auskommen. A 96 Deeg ass dann awer nees den Optakt vun der neier Saison mam Grousse Präis vum Bahrain.