No dem Roudag e Mëttwoch goung et en Donneschdeg am Tour de l'Avenir weider. Allerdéngs ouni d'Lëtzebuerger Colin Heiderscheid a Cédric Pries.

Op der 7. Etapp vum Tour de l'Avenir goung et am Osten vun Frankräich iwwer kuerz 103,5 Kilometer vu Grésy-sur-Isere op La Giettaz. Och wann d'Etapp zimlech kuerz war, hat si et mat 5 Montéeën an 2 Tëschesprinte richteg a sech. Um Enn gouf et ee Succès vum Harold Tejada.

De Kolumbianer konnt sech am Duell géint de Belsch Mauri Vansevenant behaapten, deen ass elo awer am Maillot Jaune. De Michel Ries koum op der Etapp als gudden 13. un.

Resumé

A wéi schonns op den Etappe virum Roudag gouf vun Ufank u geraibert, fir eng Echappé aus dem Peloton eraus ze starten. D'Echappé vum Dag konnt och een Ecart erausfueren, gouf awer ëmmer méi kleng an huet sech ronn 10 Kilometer virun der Arrivée nëmmen nach aus dem Clément Champoussin, Sylvain Moniquet, Mauri Vansevenant an Harold Tejada zesummegesat.

De Peloton huet sech géint der Schluss ëmmer méi desorganiséiert an ëmmer nees Attacke goufe lancéiert. Och an der Echappé huet sech eppes gedoen: Just nach de Vansevenant an Tejada hunn Tempo gemaach. Um Enn war et een Duell en solitaire tëscht dem Belsch a Kolumbianer mat dem besseren Enn fir den Harold Tejada aus Kolumbien.

Kuerz duerno koum den 2. Ausräissergrupp an zwou Minutte méi spéit de Peloton zu La Giettaz un. Dorënner och de Michel Ries, deen en Donneschdeg als gudden 13. den Top 10 nëmme just verpasst huet. Den Arthur Kluckers hat als 58. ee Retard vu bal 16 Minutten.

Top10 vun der Etapp an dem General

Am General huet de Michel Ries ee gudde Sprong vun 9 Plazen no vir gemaach. Hei läit de Lëtzebuerger elo op iwwer 5 Minutten op der 15. Positioun. Den Arthur Kluckers gëtt als 52. op bal 40 Minutte gefouert.