Uganks vum Mount huet d'UCI, déi international Vëlosfederatioun, deen neie Kalenner fir no der Corona-Pandemie presentéiert.

Deen ass bei den Häre vun Ufank August u méi wéi chargéiert. Awer och dee vun den Dammen ass anstänneg gefëllt.

Christine Majerus iwwer Suite vu Saison / Rep. R. Simon

Net manner wéi 17. Coursse vun der WorldTour sinn tëscht August an November geplangt. Dovunner 8 an de Méint August a September ouni d'Weltmeeschterschaften ze vergiessen. Dat ass schonns immens vill, virun allem, wann ee weess, dass d'Dammen-Ekippen net dee Kontingent hunn, wéi déi vun den Hären. Fir d'Christine Majerus ass et à priori gutt, dass d'UCI een neien adaptéierte Kalenner ausgeschafft huet.

D'Christine Majerus: "Et war wichteg, dass d'UCI ee provisoresche Kalenner eraus ginn huet, fir et de Sportler ze erlaben, eppes ze hunn, wou ee sech kann drun unhalen, respektiv Hoffnung fir jiddwereen ze kréien. Wou een och säin Training nees ka gestalten, well ouni Zil ze trainéieren, ass op laang Dauer net machbar."

D'UCI huet ee Kalenner presentéiert. D'Christine Majerus ass sech awer bewosst, dass deen eventuell net esou duerchgezu ka ginn.

D'Christine Majerus: "Ech menge mir wëssen alleguer, dass dee Kalenner nees kann an d'Poubelle gepucht ginn, wann d'Situatioun sech nees verschlechtert. Mee wann de Kalenner esou duerchgezu gëtt, heescht dat virun allem, dass d'Situatioun sech nees verbessert huet an dat ass da fir jiddweree gutt. Als Sportler si mir awer bereet, fir Changementer ze erwaarden, an eis dann unzepassen.

Nei am Kalenner bei den Damme wier dëst Joer, dass Paris-Roubaix géif gefuer ginn. An dat wier eng Course op déi sech d'Christine Majerus immens géif freeën.

D'Christine Majerus: Paris-Roubaix ass natierlech eng Course déi ech onbedéngt eng Kéier wollt fueren. Et ass elo schonns puer Joer wou mir Lobby maache bei der UCI dass ënnert anerem déi Course an eise Kalenner bäigefüügt gëtt. Mir waren dat leschte schonns gudder Hoffnung, dass et schonns dëst Joer de Fall sollt sinn. Wou dunn de Kalenner Ufank vum Joer eraus koum, war et leider net de Fall a mir waren enttäuscht. Et war awer elo fir jiddwereen eng Iwwerraschung dass si et elo awer bäigefüügt hunn. Dann hoffen ech och dass bis dohinner gefuer gëtt. Wéi gesot; Et ass eng immens schéi Course an ech si frou wann ech dës Course kann eng Kéier fueren. Wann net dëst Joer, dann dat nächste Joer.

Wann déi sanitär Situatioun et zou léist soll Paris-Roubaix fir Dammen den 25. Oktober gefuer ginn.