An den nächsten Deeg waarden 2.200 Kilometer a ronn 30.000 Héichtemeter op de Lëtzebuerger Sportler.

No sengem Weltrekord iwwert 24 Stonnen ass fir de Ralph Diseviscourt en Dënschdeg den Owend kuerz no 20.30 Auer de Startschoss bei der Race Around Austria gefall.

START! Den Dizzy ass gestart! Mir haalen Ierch hei op Facebook regelmäßeg um Laafenden. — Dizzy has started the race! We‘ll keep you up to date here on Facebook!

Gepostet von Ralph "Dizzy" Diseviscourt am Dienstag, 11. August 2020

Bei RTL héiert dir all Dag ëmmer am Mëttesjournal um Radio, wou de Ralph Diseviscourt an der Course drun ass, an och op RTL.lu hale mir iech um Lafenden.

D'Arrivée dierft e Samschdeg am Laf vum Dag sinn.

Virschau op d'Race Around Austria

Ralph Diseviscourt start bei der Race Around Austria / Reportage Rich Simon

Et ass dat grousst Zil vum extreme Coureur fir dëst Joer. Et sinn 2.200 Kilometer ze fueren, dat mat am ganze ronn 30.000 Héichtemeter. No sengem Weltrekord iwwer 24 Stonnen zu Veianen um Oberbecken, huet de Ralph Diseviscourt déi éischte Woch duerno, fir seng Verhältnisser, net vill trainéiert. Dunn ass d'Preparatioun fir d'Course an Éisträich awer direkt nees richteg ugaangen.  

"Déi zwou Wochen duerno hunn ech du probéiert, de Volume an d'Intensitéit an d'Luucht ze setzen. Ech sinn dunn och an d'Vogese gefuer, fir Biergtraining ze maachen. An Éisträich ass d'Erausfuerderung eng aner wéi zu Veianen, wou de Parcours komplett flaach war. An Éisträich gëtt et mat iwwer 30.000 Héichtemeter méi schwéier vum Profil hier. Dat waren 2 Woche wou ech méi intensiv a méi laang trainéiert hunn. Elo déi leschte Woch hunn ech nees bëssen eraus gehol,l fir a Rou un den Depart an Éisträich ze goen.

2017 krut de Ralph Diseviscourt bei der Race Around Austria déi 2. Plaz. Dëst Joer ass d'Konkurrenz ganz staark. Ënnert anerem ass säin Dauerrival Christophe Strasser um Depart. Den Éisträicher hält och de Streckerekord bei dëser Course. Do dernieft kënnt awer och nach Konkurrenz aus Däitschland.

De Ralph Diseviscourt

De Rainer Steinberger, een Däitschen, deen zejoert an Éisträich gewanne konnt, ass och dobäi. Mat him wieren et scho schéin Dueller ginn, sou den Diseviscourt. Och den Thomas Mauerhofer, en anere Coureur, deen de Lëtzebuerger vun der Race Across America 2018 kennt an eng Zäit laang hannert dem Ralph Diseviscourt op der 3. Plaz louch an awer dunn onglécklecherweis an een Accident verwéckelt gouf an opgi misst. Dat alles wiere Leit, déi ganz staark anzeschätzen sinn a wou d'Dagesform wäert entscheeden, wien herno d'Nues wäert vir hunn.

Den Extremcoureur ass en Dënschdeg den Owend um 20.34 Auer un den Depart vun der Race Around Austria gaangen. D'Arrivée ass dann e Samschdeg am Laf vum Dag.