D´Hollännerin huet sech uewen um Mur de Huy knapps virun der Polin Katarzyna Niewiadoma duerchgesat.

Bei der Flèche Wallonne fir Damme gouf et e Mëttwoch no 130 Kilometer ee Succès d'Weltmeeschterin Anna van der Breggen. D'Hollännerin huet sech uewen um Mur de Huy knapps virun der Polin Katarzyna Niewiadoma duerchgesat. Déi drëtte Plaz war fir d'Italienerin Elisa Longo Borghini.

Fir d'Anna van der Breggen ass et déi 7. Victoire nonee bei der Flèche Wallonne.

Déi eenzeg Lëtzebuergerin um Depart Claire Faber ass d'Course net op een Enn gefuer. Fir d'Claire Faber war et eng Première. Fir déi éischte Kéier iwwerhaapt ass d'Lëtzebuergerin un den Depart vun enger WorldTour-Course gaangen.

Claire Faber iwwer Erfarung bei Flèche Wallonne / Reportage Rich Simon

Wat eng Éier fir hei dierfen um Depart ze stoen. Mat enger Mur de Huy dran, wou ee soss just um Fernsee kuckt. Ech mengen et ass den héchsten Niveau. Mir schwätzen hei iwwer WorldTour. Dat mierkt een och, wann een hei um Depart steet, dass et net nëmmen eng Course ass, mee dass et wierklech ëm eppes geet. Do si mir als kleng Ekipp nach ganz am Ufank. Mir dréinen nach un de "basic"-Schrauwen. Fir d'Ekipp ass et awer mega, fir hei dierfe mat ze fueren.

D'Claire Faber fiert am Andy Schleck senger Ekipp. Fir déi war et no der Amstel Gold Race e Sonndeg, réischt déi zweete Participatioun bei enger Worldtour-Course. Duerch déi sanitär Moossname war den Depart vun der Dammecourse schonns e Mëttwoch de Moien um hallwer 9.

Dat heescht mir hu mussen um 6 Auer opstoen. Dat ass definitiv net meng Zäit. Ech sinn absolut kee Frühaufsteher. Ech wëll net soen opgereegt, mee et weess een, dass ee muss um hallwer 9 prett sinn, fir um Depart ze stoen. Ech hat dunn awer keng gréisser Problemer, fir opzestoen a mech prett ze maachen. Et weess ee schonns wat fir eng Course um Programm steet an et ass cool hei matzefueren.

D'Claire Faber ass d'Flèche Wallonne net op een Enn gefuer. No ronn 100 Kilometer an dem éischte Passage uewen um Mur de Huy, ass d'Lëtzebuergerin vum Vëlo geklommen. E Sonndeg steet elo den nächste grousse Rendez-vous um Programm. Da geet d'Claire Faber un den Depart vu Léck-Baaschtnech-Léck.

D'Resultat

1 VAN DER BREGGEN Anna SD Worx 3:28:27
2 NIEWIADOMA Katarzyna Canyon SRAM Racing ,,
3 LONGO BORGHINI Elisa Trek-Segafredo Women ,,
4 VAN VLEUTEN Annemiek Movistar Team ,,
5 GARCÍA Mavi Alé BTC Ljubljana ,,
6 LABOUS Juliette Team DSM ,,
7 WINDER Ruth Trek-Segafredo Women ,,
8 LUDWIG Cecilie Uttrup FDJ Nouvelle Aquitaine Futuroscope ,,
9 SPRATT Amanda Team BikeExchange ,,
10 VOLLERING Demi SD Worx ,,