Arsenal, den Tabelleleader aus der Premier League, huet sech e Samschdeg a leschter Sekonn misse mat 1:2 géint Aston Villa geschloe ginn, deen doduerch op dräi Punkten un d’Spëtzt eru réckelt. Dovu profitéiert huet och Manchester City, deen duerch eng Victoire géint Sunderland elo nees just zwee Punkten hannert Arsenal steet. A Spuenien ass et Villarreal iwwerdeems gelongen, déi drëtt Tabelleplaz direkt hannert Real Madrid a Barcelona ze festegen.
An der Major League Soccer (MLS) war e Samschdeg den Owend dann nach de sougenannten MLS Cup, wou béid Gewënner aus der Eastern an der Western Conference openeegetraff sinn. Dobäi huet Inter Miami mam Lionel Messi sech mat 3:1 géint d’Vancouver Whitecaps duerchgesat, bei deenen zanter dëser Saison den Thomas Müller ënner Kontrakt steet. Fir Inter Miami ass et den éischten MLS-Cup-Titel an der Veräinsgeschicht.
Inter Miami - Vancouver Whitecaps 3:1
1:0 Ocampo (8'), 1:1 Ahmed (60'), 2:1 de Paul (71'), 3:1
Am Chase Stadium zu Fort Lauderdale ass Vancouver duerch e Selbstgol fréi a Réckstand geroden. Duerno ware si awer gréisstendeels déi besser Ekipp, sou datt et mat enger liicht glécklecher Féierung fir Miami an d’Paus gaangen ass. Eng véierel Stonn nom Säitewiessel krute sech d’Whitecaps da fir hir Beméiunge mam verdéngten 1:1 belount. Elo huet et sou ausgesinn, wéi wa Vancouver de Match ganz dréine géif. Kuerz nom 1:1 sollte de Ball awer nom Schoss vum Sabbi zwee Mol op de Potto goen. Op der anerer Säit ass dann awer Miami den 2:1 duerch den de Paul no Viraarbecht vum Messi gelongen. Mam 3:1 an der 96. Minutt war dann alles kloer a Miami konnt am leschte Match an der Karriär vum Sergio Busquets an Jordi Alba de Succès vum MLS Cup feieren.
Aston Villa - Arsenal 2:1
1:0 Cash (36'), 1:1 Trossard (52'), 2:1 Buendia (90+6')
Aston Villa huet sech a leschter Zäit immens formstaark gewisen an ass elo och de grousse Coup beim Tabelleleader gelongen. Virun den eegene Spectateure war Villa duerch de Matthew Cash no enger gudder hallwer Stonn a Féierung gaangen a konnt dës an enger ausgeglachener Partie och mat an d’Paus huelen. Nom Säitewiessel huet Arsenal dann direkt Drock gemaach an huet sech dann och zimmlech séier mam 1:1 duerch de Leandro Trossard belount. Fir de Rescht vun der Partie war et dann een intensive Match op Aenhéicht, an deem sech béid Ekippen op d’mannst nach ee Gol verdéngt hätten. Dat néidegt Gléck sollt kuerz viru Schluss dann den Emilia Buendia hunn, dee mat sengem Gol an der 95. Minutt fir d’Decisioun gesuergt huet.
Manchester City - Sunderland 3:0
1:0 Ruben Dias (31'), 2:0 Gvardiol (35'), 3:0 Foden (65')
Manchester City huet vum Ausrutscher vun Arsenal profitéiert a réckelt duerch eng verdéngte Victoire doheem géint Sunderland nees op zwee Punkten un d’Tabellespëtzt erun. No de Goler vu béiden Defenseure Ruben Dias a Josko Gvardiol war et no 45 Minutte mat enger 2:0-Féierung an d’Vestiaire gaangen. Och no der Paus war City weider déi besser Ekipp a spéitstens mam 3:0 duerch de Phil Foden war kloer, datt si sech déi dräi Punkten net méi géifen huele loossen.
Bournemouth - Chelsea 0:0
LINK: D’Resultater, d’Tabell an d’Statistike vun der Premier League
Sassuolo - Florenz 3:1
0:1 Mandragora (9'), 1:1 Volpato (13'), 2:1 Muharemovic (45+1'), 3:1 Koné (65')
Inter Mailand - Como (18.00 Auer)
LINK: D’Resultater, d’Tabell an d’Statistike vun der Serie A
Nantes - Lens 1:2
0:1 Thauvin (34'), 1:1 El-Arabi (38'), 1:2 Said (81')
Toulouse - Stroossbuerg 1:0
1:0 Emersonn (18')
LINK: D’Resultater, d’Tabell an d’Statistike vun der Ligue 1
Villarreal - Getafe 2:0
1:0 Buchanan (45+5'), 2:0 Mikautadze (64')
Mat enger 2:0-Victoire géint Getafe huet Villarreal seng drëtt Plaz an der spuenescher La Liga gefestegt. Kuerz virun der Paus war d’Lokalekipp duerch ee Gol vum Tajon Buchanan a Féierung gaangen a konnt no der Paus am Numm vum Georges Mikautadze noleeën. De Gäscht war et trotz dem Réckstand net méi gelongen, offensiv zu Chancen ze kommen, sou datt Villarreal sech um Enn déi dräi Punkte verdéngt séchere konnt.
LINK: D’Resultater, d’Tabell an d’Statistike vun der La Liga
