Bei der Weltmeeschterschaft am Fechten zu Budapest an Ungarn huet d'Lis Fautsch am Deegen mat 10:11 an der Véierelsfinall verluer.

Fir d'Lis Fautsch war et u sech richteg gutt gelaf bei der WM am Fechten. D'Lëtzebuergerin huet en Donneschdeg de Moien fir d'éischt an de 1/16-Finalle mat 15:11 géint d'Russin Violetta Khrapina gewonnen, fir sech duerno mat 14:13 géint d'Franséisin Auriane Mallo ze behaapten. D'Mallo ass aktuell d'Nummer 16 op der Welt, d'Lëtzebuerger Championne am Deegen steet op der 87. Plaz.

An den 1/8-Finalle krut d'Lis Fautsch et mat der Nummer 42 Alexandra Ndolo aus Däitschland ze dinn. Hei konnt sech d'Lëtzebuergerin mat 15:12 géint hir Géignerin duerchsetzen.

An der Véierelsfinall war et dunn awer eriwwer, do war d'Lëtzebuergerin dem Nathalie Moellhausen aus Brasilien no Verlängerung mat 10:11 ënnerleeën an esou verpasst si ganz knapps eng Medail. Am RTL-Interview huet d'Sportzaldotin erkläert, dass si sech ëm eng Medail bedru fillt. Beim Stand vun 10:10 hätt si hir Géignerin mam Deegen um Knéi getraff. Den Arbitter hätt awer gesot, dass d'Lëtzebuergerin de Buedem getraff hätt. De Flavio Giannotte hätt et selwer och gefilmt an do géing ee kloer gesinn, dass d'Fautsch d'Brasilianerin trëfft. Ee Protest huet d'Lis Fautsch net dierfe maachen. Aus dësem Grond kann d'Lëtzebuerger Sportlerin sech och nach net iwwer hir ganz gutt Leeschtung freeën. D'Nathalie Moellhausen wier eng unerkannten Athletin, wou e renomméierten Trainer géing hannendru stoen an et wier einfach onfair, dass een op déi Aart a Weis eng Medail verléiert.

D'Nathalie Moellhausen ass um Enn dann och nach Weltmeeschterin ginn, si huet d'Finall mat 13:12 géint d'Shen Lin aus China gewonnen. Dass d'Brasilianerin den Titel geholl huet, ënnersträicht nach emol déi excellent Leeschtung vum Lis Fautsch, wäert d'Lëtzebuergerin awer net tréischten.

AUDIO: Emotional Reaktioun vum Lis Fautsch

Mam Flavio Giannotte huet och bei den Hären ee Lëtzebuerger et mam Deegen an de 64-Tableau gepackt. De Lëtzebuerger Champion ass e Freideg de Moien am Asaz.