E Méindeg den Owend war den Ofschloss vun der 1. Ronn an der däitscher Coupe.

De KSC huet fir eng Iwwerraschung gesuergt, Stuttgart huet de Sprong an den nächsten Tour nëmmen esou just gepackt a Wolfsburg huet sech zu Halle an der Verlängerung behaapt. Bayern hat keng gréisser Schwieregkeeten zu Cottbus.

Energie Cottbus - Bayern München 1:3

Den Ofschloss vum 1. Tour am DFB-Pokal war mat der Partie Cottbus – Bayern. Am Stadion der Freundschaft stoung et no den éischte 45 Minutten 1:0 fir de grousse Favorit aus Bayern, dat duerch ee Gol vum Robert Lewandowski. Cottbus huet mat senge Moyenen awer ganz gutt matgehalen.

Esou konnt den Energie an der 2. Hallschecht och déi eng oder aner Offensivaktioun a Richtung Gol vum Manuel Neuer starten. D’Cottbusser bloufen insgesamt awer ze ongeféierlech, soudatt den FCB näischt méi ubrenne gelooss huet. Nom Kingsley Coman sengem 2:0 an dem Lewandowski sengem 3:0 war de Bayern d’Victoire net méi ze huelen - och wann de Cottbusser Berkan Taz an der leschter Minutt no engem Eelfter nach op 1:3 verkierzt huet.

Karlsruher SC - Hannover 2:0

Bei dem dach zimlech iwwerraschenden Erfolleg vu Karlsruhe, dem Opsteiger an déi 2. Bundesliga, géint Hannover 96, den Ofsteiger aus der 1., war den Dirk Carlson am Kader. De Lëtzebuerger Nationalspiller koum awer net zum Asaz. D'Goler fir de KSC sinn eréischt an der 2. Hallschecht gefall an zwar duerch de Lukas Grozurek an de Marvin Wanitzek, dat per Eelefter.

Hansa Rostock - VfB Stuttgart 0:1

Hansa - VfB: dat war schonn d'Affiche am leschte Joer an der 1. Ronn vum DFB-Pokal an deemools huet sech den Underdog aus dem Norden duerchgesat. E Méindeg sollt dësen Zeenario sech awer net méi widderhuelen, well Stuttgart a Persoun vum Hamadi Al Ghaddiou fréi op 1:0 setze konnt.

Hansa war awer weider ganz aktiv, ma no den 90 Minutte konnten d'Schwaben awer de knappen 1:0 iwwer d'Zäit bréngen.

Hallescher FC - VfL Wolfsburg 3:5 n.V.

Zu Halle war Wolfsburg de klore Favorit, ma kuerz virum Téi ass d'Heemekipp awer a Féierung gaangen. D'Äntwert vum VfL koum awer direkt eng Minutt méi spéit: de Wout Weghorst huet fir den 1:1 gesuergt. D'Wölfe sinn dunn am weidere Verlaf vun der Partie duerch de Yannick Gerhardt an Avantage geroden an et huet no enger däitlecher Nummer ausgesinn.

De Sebastian Mai konnt awer nees fir Halle ausgläichen an esou war Wolfsburg nees gefuerdert. An d'Äntwert sollt och kommen, dat duerch ee Gol vum Defenseur William. Um Enn koum den Hallescher FC awer nach eemol zeréck: de Mathias Fetsch hat an der Nospillzäit mat engem Käpper de Filet fonnt.

Mat engem 3:3 goung et an d'Verlängerung, déi awer bannent 4 Minutten entscheet war. An der 92. konnt de Robin Knoche op 4:3 setzen a just 2 Minutte méi spéit huet de Josip Brekalo mat sengem 5:3 fir d'Entscheedung gesuergt.

Huet den tëschenzäitlechen 1:1 fir Wolfsburg markéiert: de Wout Weghorst. / © afp