Liverpool klappt Southampton mat 2:1,a Spuenien ka sech Real Madrid mat 3:1 géint Celta Vigo behaapten.

No der Defaite vum FC Barcelona a Spuenien um Freideg stoung um Samschdeg den zweeten Deel vum éischte Spilldag a Spuenien um Programm, wou ënnert anerem Real Madrid am Asaz war. An der englescher Premier League an an der franséischer Ligue 1 waren et ewell jeeweils den zweete Spilldag.

Premier League

Southampton - Liverpool 1:2

Um zweete Spilldag vun der englescher Premier League hat den FC Liverpool et mat Southampton ze di krut. Trotz optescher Iwwerleeënheet hat et bis zur Nospillzäit vun der éischter Halschent gedauert, éiert de Mané fir d'"Reds" markéiere konnt, dëst mat engem flotte Schoss aus ronn 16. Meter.No engem Feeler an der Defense vun der Lokalekipp konnt sech de Firmino behaapten an op 2:0 stellen.
Ma och op der Säit vu Liverpool koum et an der Defense zu kapitale Feeler. Den Adrian am Gol vu Liverpool konnt de Ball net aus dem Strofraum klären a sou konnt den Ings de Ball no enger Feelpass vum Golkipp ouni Problemer am Gol ënnerbréngen. Um Enn sollt et fir Liverpool fir eng 2:1-Victoire duergoen.

Manchester City - Tottenham

Nodeems Liverpool méi fréi am Mëtteg virgeluecht hat, wollte souwuel Manchester City ewéi och Tottenham nozéien. 
No enger präziser Flank vum De Bruyne stoung de Sterling an der 20. Minutt um 2. Potto ze fräi a konnt de Ball mam Kapp am Filet ënnerbréngen. 
Ma d'Freet war just vu kuerzer Dauer. Nëmmen dräi Minutte méi spéit hat de Lamela et aus grousser Distanz probéiert. Säi Schoss gouf nach liicht vun engem Defenseur deviéiert, sou dass den Ederson keng Chance hat.
An der 35. Spillminutt konnt d'Lokalformatioun déi zweete Kéier a Féierung goen. No enger schaarfer Pass an de Strofraum vum De Bruyne konnt den Aguero de Ball aus kuerzer Distanz iwwert d'Linn drécken. 
Fir de Schlusspunkt sollt Tottenham dann awer suergen. An der 56. war et de Lucas, dee sech no engem Corner mam Kapp duerchsetze konnt. An der Nospillzäit koum et nach zu enger hëtzeger Decisioun. Nodeems de Jesus de Ball am Gol ënnerbruecht hat gouf de Videoassistent ëm Rot gefrot. Dësen hat um Enn op kee Gol entscheet, well de Ball virdru mat der Hand beréiert gouf.
Soumat trenne sech Manchester City an Tottenham um Enn 2:2

Ligue 1

© France Knaff

FC Metz - AS Monaco 3:0

Den Opsteiger aus Metz konnt schonn um 1. Spilldag e Punkt sécheren an wollt mat deem Wand am Réck direkt noleeën. Dat konnte si androcksvoll doheem géint Monaco maachen. Schonn no 11 Minutten huet den Diallo vum Punkt getraff an d'Ekipp aus der Groussregioun a Féierung bréngen. Et war de Videoarbitter, deen de Schiidsriichter op eng Situatioun am Strofraum opmierksam gemaach hat.

Fir Monaco gouf d'Missioun dann no 34 Minutten nach méi schwéier, well den Aguilar no engem Foul direkt déi rout Kaart gewise krut. Monaco konnt d'Iwwerzuel notzen an den Diallo huet no 52 Minutte säin zweet Gol geschoss, de Cohade konnt dann no 66 Minutte souguer nach erhéijen.

Weider Detailer zum Match bei eise Kollege vu 5Minutes.

La Liga

Celta Vigo - Real Madrid 1:3

An der spuenescher La Liga wollt Real Madrid den Ausrutscher vu Barcelona, déi um Freideg 1:0 géint Bilbao verluer haten, ausnotzen. No 12. Minutte war et de Benzema, deen de Wee fir Real opgestouss hat a markéiere konnt. An der 56. Minutt huet Madrid sech dunn allerdéngs selwer geschwächt. De Modric krut an der 56. Minutt no engem Feeler déi rout Kaart, ma dëst schéngt dem Zidane seng Ekipp net geschockt ze hunn. An der 61. Minutt hat sech den Toni Kroos een Häerz geholl an et aus grousser Distanz probéiert. Dem Däitsche säi Schoss hat uewen am lénken Eck ageschloen, ee super Gol. Fir d'Entscheedung konnt de Vazquez an der 80. Minutt suergen, éiert dem Losada an der Nospillzäit just nach den Uschloss gelonge war.