An der éischter Partie vum Sonndeg an der Bundesliga ka sech Freiburg iwwerraschend däitlech mat 3:0 géint Hoffenheim duerchsetzen.

Bundesliga

Hoffenheim - Freiburg 0:3

Freiburg ass gutt an de Match komm a konnt schonn an der 11. Minutt mat 1:0 a Féierung goen an dat duerch e Gol vum Günter. An de Minutten dono hat och Hoffenheim seng Chancen mee et waren d'Freiburger déi hir Chancen besser konnte notzen a soumat och an der 38. Minutt duerch den Haberer op 2:0 erhéijen.
Och no der Paus huet Hoffenheim villes probéiert mee et waren dann awer nees d'Gäscht déi zougeschloen hunn an dat a Persoun vum Petersen an der 59. Minutt a maachen domat d'Victoire perfekt. An der Tabell steet Freiburg domadder elo op der 3. Plaz.

Paderborn - Schalke 1:5

Paderborn konnt schonn no 8 Minutten duerch e Gol vum Oliveira Souza a Féierung goen an dono waren et dann déi Schalker déi als éischt direkt e puer Chancen leie gelooss huet éiert se dann an der 33. Minutt endlech den 1:1 duerch de Sané konnte schéissen. Kuerz no der Paus konnten d'Gäscht dann mat 2:1 a Féierung goen wéi de Serdar no engem Feeler an der Defense de Ball konnt am Gol ënnerbréngen. Paderborn huet awer weider gutt matgespillt a konnt sech och nach weider Chancen erausspillen. Mee an der 71. Minutt huet den Harit mam 3:1 fir d'Virentscheedung gesuergt. Fir Paderborn sollt et dann nach méi batter kommen wëll an der 83. Minutt konnt de Kutucu de 4:1 schéissen. Just 3 Minutten dono huet den Harit mat sengem zweete Gol dann nach op 5:1 gestallt.

Premier League

Watford - Arsenal London 2:2

No der éischter Halschent hat et gutt fir Arsenal ausgesinn nodeems den Aubameyang (21.', 32.') direkt 2 mol markéiere konnt. Allerdéngs ass Watford no der Paus nach eng kéier zeréck komm a konnt duerch Goler vum Cleverley (53.') a Pereyra (81.') nach op 2:2 stellen a soumat 1 Punkt mathuelen.

Bournemouth - Everton 3:1

1:0 Wilson (23.'), 1:1 Richarlison (44.'), 2:1 Fraser (67.'), 3:1 Wilson (72.')