Iwwerdeems stoung de Leandro Barreiro bei Mainz vun Ufank un um Terrain an de Jeff Saibene wënnt mam FC Ingolstadt.

An der 3. Liga an Däitschland huet de Maurice Deville mat Waldhof Mannheim 0:0 géint Eintracht Braunschweig gespillt. De Nationalspiller stoung de ganze Match um Terrain. An der Tabell steet Mannheim op der 6. Plaz.

Den Tim Hall an de Marvin Martins stoungen bei Karpaty Lwiw an der Ukraine an der Startopstellung an hunn de ganze Match gespillt. Allerdéngs verléiert hir Ekipp mat 2:6 géint Desnau. De Gerson Rodrigues verléiert mat Dynamo Kiew mat 1:2 géint Luhansk. De Rodrigues souz 90 Minutten op der Bänk.

An Zypern stoung de Vahid Selimovic während 90 Minutten bei Apollon Limassol um Terrain a gewënnt mat 3:1 géint Larnaka.

An der Bundesliga stoung de Laurent Jans bei Paderborn 90 Minutte laang um Terrain. Um Enn konnt sech de Lëtzebuerger a seng Co-Ekippieren iwwert eng 1:0-Victoire zu Bremen freeën.

Samschdeg

Den FC Ingolstadt huet sech mam Jeff Saibene mat 2:0 zu Magdeburg duerchgesat a klëmmt domat an der 3. Liga op déi 2. Plaz an der Tabell.

De Leandro Barreiro stoung um 14. Spilldag an an der Startformatioun beim FSV Mainz 05. Beim Stand vun 1:1 ass de Lëtzebuerger Nationalspiller an der Paus ausgewiesselt ginn. Zum Schluss muss sech Mainz nach mat 1:2 géint Augsburg geschloe ginn.

De Kevin Malget an den Anthony Moris hu mat Excelsior Virton 1:1 géint Beerschot VA gespillt. An der Proximus Ligue steet Virton weiderhin op der 2. Plaz an der Tabell.

Am Match géint Akhmat Grozny stoung den Olivier Thill iwwer 77 Minutten um Terrain. Zum Schluss gëtt et fir den FK Ufa am russesche Championnat eng 1:0-Victoire an dräi Punkten, mat deenen d'Ekipp aus Russland an der Tabell op déi 7. Plaz klëmmt.

De Christopher Martins war bei der 1:0-Victoire vu Young Boys Bern géint Luzern de ganze Match am Asaz. An der Tabell vum schwäizer Championnat steet d'Ekipp vu Bern domat weiderhin un der Tabellespëtzt.

De Vincent Thill misst sech an de 1/64-Finalle vun der Coupe de France mam US Orléans mat 0:1 géint Rouen geschloe ginn. De Lëtzebuerger Nationalspiller stoung de ganze Match um Terrain.

Freideg

An der Eerste Divisie an Holland huet Maastricht e Freideg den Owend géint Utrecht 1:1 gläichgespillt. Den Enes Mahmutovic stoung fir Maastricht déi 90 Minutten iwwer um Terrain. Fir d'Lokalekipp ass et e wichtege Punkt, well et stécht een aktuell am Ofstigskampf.

An der 2. Bundesliga an Däitschland koum den Dirk Carlson e Freideg den Owend beim Karlsruher SC net an den Asaz. De Veräin vum Lëtzebuerger Nationalspiller huet 2:2 zu Bielefeld géint den Tabelleleader gläichgespillt.

An der Ligue 1 a Frankräich huet Lille géint Stade Brest 1:0 gewonnen. D'Ekipp vum President Gérard Lopez steet an der provisorescher Tabell elo op der 3. Plaz. Den decisive Gol huet den Osimhen an der 16. Minutt geschoss. Sekonne viru Schluss huet de Bamba nach een Eelefmeter laanscht de Gol gesat.