Bei den Dammen hu sech d'Ashleigh Barty, d'Sofia Kenin, d'Garbine Muguruza an d'Simona Halep fir d'Halleffinalle qualifizéiert.

De Roger Federer steet bei den Australian Open an der Halleffinallen. Hien huet sech géint den Tennys Sandgren a 5 Sätz (6:3,2:6,2:6,7:6,6:3) duerchgesat . Fir ze wannen, huet de Federer misse 7 Mätchbäll ofwieren.

An der zweeter Véierelsfinall vum Dag huet den Novak Djokovic sech an 2 Sätz (6:4,6:3,7:6) géint de Milos Raonic duerchgesat. Domadder kënnt et an der Halleffinall zum Duell Federer-Djokovic.

Um Mëttwoch de Moien eiser Zäit konnt den Däitschen Alexander Zverev sech a 4 Sätz géint de Schwäizer Stan Wawrinka behaapten. Den 1. Saz goung nach mat 6:1 un de Wawrinka. Duerno hat de Schwäizer awer net méi vill ze gutt. Um Enn steet et 1:6, 6:3, 6:4 a 6:2 fir den Zverev. Den Däitschen huet no senger Victoire nach eng Kéier betount, datt hien am Fall vun enger Victoire säi ganzt Präisgeld wäert spenden.

Hie spillt elo géint den Dominic Thiem. Den Éisträicher huet et fäerdeg bruecht, fir de Rafael Nadal an engem richtege Krimi, deen iwwer 4 Stonne gedauert huet, ze eliminéieren. A 5 Sätz mat 7:6 (7:3), 7:6 (7:4), 4:6 a 7:6 (8:6) huet hie sech géint d'Nummer 1 op der Welt duerchgesat. Fir den Zverev an den Thiem ass et déi éischte Kéier an hirer Karriär, datt si bei engem Grand Slam an der Halleffinall stinn.

Bei den Dammen huet d’Ashleigh Barty d’Petra Kvitova mat 7:6 a 6:2 geklappt a sech fir d’Halleffinall qualifizéiert. Hei trëfft si op d'Sofia Kenin, déi sech mat zwee Mol 6:4 géint Ons Jabour behaapt huet.

Am Match tëscht dem Garbine Muguruza géint d'Anastassija Pawljutschenkova konnt sech d'Spuenierin mat 7:5 a 6:3 duerchsetzen.

An der leschter Véierelsfinall hat d'Simona Halep keng Problemer mam Anett Kontaveit. Um Enn stoung et 6:1, 6:1.