Zanter Woche gouf driwwer spekuléiert, zanter en Dënschdeg ass et offiziell: De fréieren Trainer vun der Fola sëtzt an Zukunft zu Hesper um Trainerstull.

Et ass elo offiziell. De Jeff Strasser ass den neie Futtballtrainer vun Hesper. Hien huet e Kontrakt vun 3 Saisonen ënnerschriwwen. Et war an de leschte Woche jo en oppent Geheimnis, datt et fir de fréiere Bundesliga-Profi vum Escher Gaalgebierg an Direktioun Holleschbierg bei den neie Becca-Veräi géif goen.

De Strasser war déi lescht 10 Joer Trainer bei der Fola a stoung mat deenen Rout-Wäissen 3 Mol um Enn vun der Saison ganz uewen an der Tabell. Kuerzfristeg wëll hien och scho mam Swift uewe matspillen.

De Jeff Strasser: "Ech hunn eng nei Erausfuerderung fir mech gesicht. D'Fola gehéiert elo zum Passé. Et war wichteg fir mech, zwou Saache virgeluecht ze kréien. Kuerz a mëttelfristeg Ziler an eng kompetitiv Ekipp. Et si jo schonn Transferte bekannt, an et wäert och nach deen een oder aneren dobäi kommen."

Extrait Jeff Strasser

Wat mam Trainer Dan Theis geschitt, deen nach e Kontrakt vun engem Joer beim Swift huet, ass nach net gewosst. Dat ass eng delikat Saach, sot de President vun Hesper Fernand Laroche, et géif een awer bestëmmt eng Léisung fannen.

Beim Swift gëtt et elo eng Jugend-Akademie an et ass och eng Zesummenaarbecht mam Noper Izeg virgesinn, esou datt jonk Spiller do an der 1. Divisioun Spillpraxis sammele kënnen.