E Freideg stinn am Katar déi zweet Matcher an de Gruppen A a B um Programm.

Resumé WM / Reportage Sam Rickal

Am Grupp A verléiert de Katar géint de Senegal an Holland huet mam Ecuador just gläich gespillt. Doduerch steet elo scho fest, dass de Katar eliminéiert ass.

Am Grupp B konnt den Iran den éischte Match vum Dag, géint Wales mat 2:0 gewannen. Wales stoung vun der 85. Minutt un nëmmen nach zu 10 um Terrain.

Am leschte Match vum Dag huet England offensiv enttäuscht am 0:0 géint d'USA.

Grupp A

Katar - Senegal 1:3
0:1 Dia (41'), 0:2 Diedhiou (48'), 1:2 Muntari (78'), 1:3 B.Dieng (84')

E Freideg de Mëtteg um 14 Auer war et am Grupp A de Match tëscht dem Katar a Senegal. Béid Ekippen haten hir Optaktmatcher géint den Ecuador, respektiv géint Holland verluer. Et goung hei deemno drëm, nach Chancen op e Weiderkommen ze behalen.
Eng éischt héichprozenteg Golchance geet op de Kont vun de Senegalesen. Den Idrissa Gueye huet et mat engem Flachschoss probéiert, dee just ganz knapps um lénke Potto laanscht gaangen ass. An der 34. Minutt wollten d'Katarien en 11 Meter. Den Afif gouf vum Sarr geluecht, ma de Schidsriichter huet weider lafe gelooss.

An der 41. Minutt huet de Senegal dunn den 1:0 markéiert, dëst no engem katastrophalen Ofwierfeeler vum Khoukhi, deen e Ball net degagéiert krut, an dem Dia en esou propper virgeluecht huet. Deen hat keng Problemer aus kuerzer Distanz ze treffen. Et ass den 1. Gol fir Senegal op dëser WM.

Mat dësem Resultat goung et dunn och an d'Paus.

RTL

© AFP

An der 2. Hallschent konnt de Senegal no engem Corner op 2:0 erhéijen, dat no engem Kappball vum Diedhiou.

An der 68. Minutt hat de Katar eng 100%eg Chance op den 2:1, ma de Golkeeper vum Senegal konnt mat engem super Reflex de Ball vum Mohammed nach halen.

An der 78. Minutt dunn d'Erléisung... och de Katar kënnt zu sengem 1. Gol bei der WM 2022. No enger gudder Flank vu riets vum Mohammed lant beim agewiesselte Muntari, an dee käppt den 2:1.

D'Freed war awer just vu kuerzer Dauer. Am der 83. Minutt erhéicht den Dieng op 3:1 zu Gonschte vum Senegal.

An der 94. Minutt hat den Almoez nach eng Schossgeleeënheet fir op 2:3 ze verkierzen, ma de Schoss goung wäit laanscht de Gol.

Et blouf deemno beim 1:3 an de Senegal séchert sech déi éischt 3 Punkte vun dëser WM a behält soumat Chancen en Tour weider ze kommen. Fir de Katar bleift et bei 0 Punkten aus zwee Matcher.

Holland - Ecuador 1:1
1:0 Gakpo (6'), 1:1 Valencia (49')

Am Match tëscht Holland an Ecuador hätt et eng Virentscheedung ëm d'fréizäiteg Qualifikatioun fir d'Aachtelsfinalle kënne ginn. Béid Ekippen haten hiren éischte Match gewonnen.

De bessere Start an de Match haten d'Oranjes. Et huet just bis déi 6. Minutt gedauert, éier de Gakpo mat engem Lénksschoss den 1:0 geschoss huet. Duerno huet sech d'Spill e bësse berouegt. Béid Ekippen hunn zwar héich Quote beim Passspill, ma eppes wierklech Geféierleches ass net zustane komm. Et huet gutt 20 Minutte gedauert bis den Ecuador den Drock konnt erhéijen an och d'Iwwerhand um Terrain iwwerholl huet. Eng kloer Golchance gouf et an der 33. Minutt, wéi den Noppert sech no engem strammen Distanzschoss vum Valencia laang huet musse maachen.
An der 48. Minutt ass dunn tatsächlech nach e Gol gefall, zu Gonschte vum Ecuador. No engem Corner konnt den Estupinan aus kuerzer Distanz markéieren, ma de Fändel vum Linneriichter war direkt an der Luucht. De VAR huet dat ganzt nach emol kontrolléiert an d'Decisioun bestätegt. Et bleift also beim 1:0 fir Holland, déi sech iwwert en 1:1 net hätten dierfe beschwéieren.

An der 2. Hallschent koum op Säite vun Holland den Depay era fir de Bergwijn. D'Ufanksphas war roueg... bis zur 49. Minutt. Do konnt de Valencia nämlech fir Ecuador den 1:1 markéieren, dat no engem Schoss vum Estupinan, deen den Noppert zwar hale konnt... ma direkt virun d'Féiss vum Valencia, dee sech dat net zwee mol huet musse soe loossen. Et goufen nach Reklamatioune wéinst enger eventueller Abseitspositioun, ma déi gouf net bestätegt. Deemno war et de verdéngten 1:1.

An der 59. Minutt hat Ecuador direkt zwou grouss Chancen op den 2:1, ma konnt keng vu béide Chancë verwandelen. E Schoss vum Valencia gouf nach ofgeblockt, den Noschoss vum Platas lant op der Lat. Do hätt de Keeper Noppert keng Chance gehat!

An der 87. Minutt huet de Valencia sech blesséiert an huet mussen ausgewiesselt ginn. Fir hie koum de Rodriguez.
Et goufen nach emol 6 Minutten Nospillzäit, an deenen awer keng vun den Ekippen den decisive Gol schéisse konnt, och wann Ecuador déi méi aktiv Ekipp war an de leschte Minutten. Et blouf deemno beim 1:1, woumat béid Ekippen op 4 Punkten no 2 Matcher kommen. Well de Senegal och schonn 3 Punkten huet, ass domat dann och scho kloer, dass de Katar virum leschte Spilldag elo schonn eliminéiert ass.

Grupp B

Iran - Wales 2:0
1:0 Chesmi (98'), 2:0 Rezaeian (101')

Déi éischt Hallschent tëscht Wales an dem Iran war gréisstendeels ausgeglach. Den Iran huet um Ufank héich gepresst a konnt an der 16. Minutt e Feeler an der Defense vun de Waliser provozéieren. De Gol, deen si doropshi geschoss hunn, gouf awer wéinst Abseits erëm oferkannt. Duerno koum Wales dann ëmmer besser an de Match an huet d'Kontroll iwwerholl. Géint déi gutt organiséiert Defense vun den Iraner, konnt d'Ekipp ëm de Gareth Bales sech awer nëmmen eng wierklech gutt Chance erausspillen. Deemno ass et mat engem 0:0 an d'Paus gaangen.

Déi 2. Hallschent hat dann direkt spektakulär ugefaangen. No engem Konter an der 50. Minutt schéissen d'Iraner direkt 2 mol op de Potto. Den Iran huet an der 2. Hallschent da méi vum Match a koum an der 72. Minutt zu enger weiderer gudder Chance. An der 85. Minutt kënnt et da knëppeldéck fir Wales. No engem laange Ball an d'Spëtzt leeft den Taremi vun den Iraner eleng op de Gol. Den Hennessey am Gol vun de Waliser kënnt eraus, fir de Ball ze klären, ass awer ze spéit an erwëscht säi Géigner mam Fouss am Gesiicht. Den Onparteiesche kuckt sech d'Zeen um Bildschierm un an zéckt duerno déi rout Kaart fir de Golkipp. Duerno geréit Wales ëmmer weider ënner Drock an an der 98. Minutt ass et esouwäit. Nodeems den Allen e Ball, dee Flaach an de Strofraum vu Wales kënnt, an de Réckraum kläert, kann den Chesmi aus 18 Meter den 1:0 fir den Iran markéieren. An der 11. Minutt vun der Nospillzäit kann den Iran dann nach den 2:0 markéieren. Wales wërft alles no vir, veréiert de Ball awer bei der Mëttellinn. De Pouraliganji leeft mam Ball no vir a leet dann op de Rezaeian eriwwer, dee markéiert, esou dass de Match mat engem 2:0 op en Enn geet.

RTL

© FADEL SENNA / AFP

England - USA 0:0

An den éischte 45 Minutten war et no enger taktesch gepräägter Ufanksphas ee Match, an deem d'USA iwwerraschend méi vum Spill hate wéi d'Three Lions an och Golchancen erausgespillt hunn. Et goung awer 0:0 an d'Paus.

Déi kloer Golchancen ass, wat déi 2. Hallschent vermësse gelooss huet. Bei den Englänner war de Wuerm dran. D'USA hunn nees matgespillt. Déi englesch Ekipp ass no de Wiessele an de leschte Minutte nees méi an d'Partie komm. Mee et sollt net sinn. Um Enn stoung et 0:0.

Tabell