Schonn e Samschdeg gouf et eng onheemlech Ophueljuegd vun den Jaguars an d'49ers hate sech géint d'Seahawks duerchgesat.

E Sonndeg du konnte sech d'Bills, d'Bengals an d'Giants fir déi nächste Ronn qualifizéieren.

E Méindeg

Dallas Cowboys - Tampa Bay Buccaneers 31:14

RTL

© Photo by Julio Aguilar / GETTY IMAGES NORTH AMERICA / Getty Images via AFP

D'Tampa Bay Buccaneers konnte sech mat hirem Star-Quarterback Tom Brady net fir d'Divisional Playoffs qualifizéieren. Doheem hate si keng Chance géint d'Dallas Cowboys, géint déi de Brady bis dee Moment a siwe Matcher nach ni verluer hat. D'Offense vun de Bucs koum einfach net an de Match an huet déi éischt 30 Minutte keng Punken op d'Board bruecht, esou datt si mat engem Réckstand vun 0:18 an d'Paus goungen. Deen Ecart konnten d'Cowboys och an der zweeter Hallschent verwalten, bei engem 6:6 am drëtten an engem 7:8 aus hirer Siicht am leschte Véierel. Domadder qualifizéiert sech "Americas Team" ouni gréisser Problemer an obwuel hire Kicker 4 vu 5 Extrapunkte verschoss huet, als lescht Ekipp fir d'Divisonal Round vun de Playoffs.

E Sonndeg

Miami Dolphins - Buffalo Bills 31:34

RTL

© BRYAN M. BENNETT GETTY IMAGES NORTH AMERICA Getty Images via AFP

D'Dolphins waren definitiv schlecht an de Match géint d'Bills gestart a louchen am Ufank vum zweete Véierel mat 0:17 hannen. Ma et war d'Defense vu Miami, déi an den zweete 15 Minutten d'Rudder iwwerholl huet an d'Bills ëmmer méi a Schwieregkeeten an hir eegen Offense an eng gutt Positioun bruecht huet. Esou konnte si 29 Sekonne virun der Paus ausgläichen, ma d'Bills kruten nach just virum Téi 3 Punkten hin, esou datt si mat engem Avantage vun 20:17 an d'Paus goungen. Kuerz nom Téi huet d'Defense vun den Dolphins d'Ekipp esouguer a Féierung bruecht, ma d'Bills konnten duerch 14 Punkten um Stéck de Match nees dréinen. Déi siwe Punkte vun den Dolphins am leschte Quarter sinn net méi duergaangen, fir de Match nach ze dréinen.

New York Giants - Minnesota Vikings 31:24

RTL

© Stephen Maturen / GETTY IMAGES NORTH AMERICA / Getty Images via AFP

D'Vikings waren no enger staarker Saison, déi si mat 13:4 ofgeschloss hunn, Favorit doheem géint d'Giants. Ma et waren awer d'Giants, déi den Ufank vum Match u sech gerappt hunn. Waren d'Vikings nach 7:0 nom éischte Ballbesëtz, hunn d'Giants aus hiren éischten dräi Chancen 17 Punkte gemaach a waren dunn 17:7 am Avantage. Nach virun der Paus koumen d'Vikings op 14:17 bäi, hunn et awer och an der zweeter Hallschent net fäerdeg bruecht, fir d'Féierung ze iwwerhuelen. Beim Stand vu 24:31 haten d'Vikings nach d'Chance, fir mam leschten Drive kuerz viru Schluss den Ausgläich ze markéieren, ma d'Defense vun den Giants huet se net vill méi wäit wéi iwwert d'Hallschent gelooss a se do gestoppt. Esou qualifizéieren sech d'Giants fir déi nächst Ronn vun de Playoffs a fir d'Vikings ass déi u sech esou gutt Saison nom éischte Playoffsmatch op en Enn gaangen.

Baltimore Ravens - Cincinnati Bengals 17:24

RTL

© Photo by Dylan Buell / GETTY IMAGES NORTH AMERICA / Getty Images via AFP

Wéineg Punkten, am Ganzen dräi, gouf et fir d'Bengals an den éischte 15 Minutten. Eng Interception vun de Bengals huet hinnen dann de Ball an der Mëtt vun dësem Véierel zeréckginn, ma si hunn iwwer 6 Minutte gebraucht, fir doraus en Avantage ze zéien an nees 6 Punkten drunzehänken. Esou ware si am Ufank vum zweete Véierel 9:0 am Virdeel, mä d'Ravens konnte bis zur Paus de Match dréinen a mat 10:9 d'Säit wiesselen. Am drëtte Véierel konnt kee sech duerchsetzen, d'Bengals konnten awer nees gläichzéien, beim Stand vu 17:17. Hir siwe Punkten an de leschte 15 Minutte sinn dann duergaangen, fir de Match ze gewannen, well hir Defense hei näischt méi zougelooss huet.

E Samschdeg

49ers - Seahawks 41:23

RTL

Brock Purdy

De Rookie Quarterback vun de San Francisco 49ers, de Brock Purdy huet seng Ekipp net am Stach gelooss. D'Geheimfavoritten op de Super Bowl hu virun allem no der Halbzeit-Paus opgetrompt. No zwou Victoiren an der regulärer Saison (27:8 an 21:13), hunn d'49ers och an der K.O.-Ronn näischt ubrenne gelooss géint d'Seahawks. Um Enn stoung et 41:23 zu Gonschte vun de 49ers.

Jaguars - Chargers 31:30

RTL

Am zweete Match ass et definitiv manner roueg iwwert d'Bün gaangen. D'Jacksonville Jaguars haten et hei mat de Los Angeles Chargers ze dinn. D'Chargers ware scho mat 27:0 vir an et huet alles no enger klorer Victoire ausgesinn. Ma dunn hunn d'Jaguars ënnert dem Lead vun hirem Quarterback Trevor Lawrence opgedréint. Nieft véier Interceptions an der 1. Hallschent stoungen um Enn och 4 Touchdown-Wërf op sengem Konto.

3 Sekonne viru Schluss konnten d'Jaguars duerch e Field Goal den decisive Punkt markéieren a sech in extremis mat 31:30 géint d'Chargers behaapten.

Divisonal Round

An der AFC sinn all d'Matcher gespillt an et ass elo kloer, wie géint wie muss untrieden. D'Chiefs, déi als beschten Ekipp an dëser Conference d'Wild Card Round iwwer fräi haten, treffen d'Jaguars, déi vun der Placéierung hier schwächsten Ekipp, déi nach weider ass. Am zweete Match mussen d'Bengals bei d'Bills reesen. Et ass de Réckmatch vum zweetleschte Spilldag, deen no dem uergen Zesummebroch vum Danar Hamlin ofgebrach an net méi gespillt gouf.

An der NFC reesen d'Giants bei d'Eagles, déi an der Wild-Card-Round fräihaten, a San Francisco wäert doheem géint d'Cowboys untrieden.