RTL-Informatiounen no soll den éischten Heemmatch an der Nations League wéi geplangt e Sonndeg um 15 Auer am Stade de Luxembourg kënnen ugepaff ginn.

Déi lescht Woch koum d’Nouvelle, datt den Terrain an engem katastrophalen Zoustand wier. De Wuess war déi lescht Méint erneiert ginn, ma doropshi goufen Irregulariéite festgestallt.

RTL

© Domingos Oliveira

Den FLF-President Paul Philipp huet eis virum Depart an Nordirland confirméiert, datt och de leschte Stand vun der Federatioun wier, datt kéint gespillt ginn.

Paul Philipp: "Jo, leschten Informatiounen no déi mer gëschter nach kritt hunn, wär absolut keng Diskussioun, dass de Match net kéint gespillt, also de Match gëtt gespillt. Ënner wat fir enge Bedingungen... optimal ass et héchstwarscheinlech net. Ech hunn elo dës Woch den Terrain nach net gesinn, mee ech ka mer net virstellen, dass an enger Woch do Wonner geschéien. Sécher ass e besser wéi d'lescht Woch, wat jo och net extreem schwéier ass. Ech menge wat och wichteg ass, dat ass, dass déi verantwortlech Leit elo mat deene Professionellen, déi eeben den Optrag hate fir deen Terrain frësch ze maachen, déi richteg Analyse maachen an och eventuell déi richteg Schlëss do draus zéie fir d' Zukunft."

Den FLF-President Paul Philipp mat Informatiounen iwwert den Terrain am Stadion

De Match en Donneschdeg den Owend an Nordirland, an och dee vun e Sonndeg géint Belarus gëtt wéi gewinnt hei op RTL iwwerdroen.