Bulli, Bulli, Bulli. Et war genau dat Wieder, dat ee mat dem Cyclocross verbënnt.

An näischt sollt propper bleiwen. D’Kärchere sinn op Héichtoure gelaf, fir d’Vëloen nees mat Zäite propper ze kréien. E Parcours, deen de Coureuren net nëmme physesch mee och technesch alles sollt ofverlaangen.

Bei den Damme waren der just 5 mat um Depart, dofir sollt et awer net manner spannend ëm d’Victoire ginn. Et war d’Kylie Bintz, dat e gudden Depart erwëscht hat a sech vun hire Konkurrentinnen Amy Breuer an June Nothum konnt ofsetzen. D’Avance sollt awer ni all ze grouss ginn, sou dass Breuer an Nothum no hallwer Course nees konnten opschléissen an och direkt laanschtzéien. Fir an de leschten Tour hat d’June Nothum dann awer déi beschte Been a konnt sech um Enn kloer virum Amy Breuer an dem Kylie Bintz duerchsetzen.

Eng Stonn méi spéit war et dunn un den Hären, déi dee schwéiere Parcours an Ugrëff geholl hunn. Hei gouf et an deenen éischten Tier ëmmer nees Féierungswiessel. Ma no 2 Tier konnt sech de Belsch Elio Clarysse, dee jo leschte Weekend seng Féierung am Skoda Cross Cup un de Lennox Papi verluer hat, un d’Spëtzt vun der Course setzen a konnt sech e klenge Virsprong rausfueren. Hannendru war et de Fransous Theo Jung, deen awer Tour fir Tour ëmmer méi no koum.

Fir an de leschten Tour ware béid Konkurrenten nees beienneen, um Enn war et den Theo Jung mat deene bessere Been a konnt d’Course fir sech entscheeden. Hannert deenen zwee Leader konnt sech de Rick Meylender als éischte Lëtzebuerger vum Ken Conter a Lennox Papi ofsetzen an huet sech déi drëtte Plaz geséchert. Fir de Leader am Skoda Cross Cup Lennox Papi war et kee sou gudden Dag.

An enger Woch geet et fir d’Cyclocross-Spezialisten dann am Préizerdaul weider.