Biissen och zu Rodange net ze stoppen, Remis tëscht Déifferdeng an Nidderkuer
Duerch eng souverän 3:0-Victoire zu Rodange ass Biissen am Championnat zanter 10 Matcher ongeschloen an zanter 5 Matcher ouni Punkteverloscht.
E Sonndeg war am nationale Futtballchampionnat d'Suite vum 14. Spilldag, nodeems sech d'UNA Stroossen e Samschdeg bei der Jeunesse zu Esch mat 2:0 duerchsetze konnt.
Dat éischt Duell vum Dag, dat schonn um 15 Auer ugepaff gouf, huet Biissen mat 3:0 zu Rodange gewonnen. No engem fréie Gol vum Guimaraes Soares an der 9. Spillminutt huet Biissen mat der Féierung am Réck d'Kontroll iwwert de Match behalen an hanne sou gutt wéi näischt zougelooss. Virun der Paus nach ass dann duerch e Kappball vum Roman Ferber de verdéngten 2:0 gefall. An der zweeter Hallschent hunn d'Gäscht dann e Gank zréckgeschalt a well eng Reaktioun vu Rodange ausbliwwen ass, konnten d'Biisser spéitstens no engem drëtte Gol duerch de Mamadi Djalo déi nächst dräi Punkte feieren, mat deenen ee virleefeg punktgläich mat Stroossen op déi zweet Tabelleplaz spréngt.
Den Tabelleleader Déifferdeng huet sech am Derby géint de Progrès Nidderkuer mat engem 1:1 getrennt. An enger ausgeglachener éischter Hallschent hate béid Ekippe jeeweils eng gutt Phas, an där awer kee sou richteg konsequent iwwerzeege konnt. Och nom Säitewiessel huet de Match de Spectateuren net all ze vill gebueden. En Distanzschoss vum Dylan Lempereur huet dann an der 64. Minutt den éischte Gol vun der Partie bruecht, deen ouni vill ze zécken an de rietse Wénkel getraff huet. Ma de Progrès konnt nach eemol eng Äntwert weisen an hëlt sech nom 1:1 duerch den Thomas Souchard vum Tabelleleader ee Punkt mat Heem.
E richtege Gol-Festival gouf et bei enger 6:3-Victoire vum F91 Diddeleng géint d'Union Titus Péiteng an och beim 5:2-Succès vum Racing géint Mamer sinn eng Rei Goler gefall. An de weidere Partië vum Sonndeg ka sech Käerjeng mat 3:1 zu Kanech duerchsetzen, Hesper spillt 1:1 zu Hueschtert a Munneref huet Rouspert mat enger 4:0-Victoire keng Chance gelooss.
Den Detail vun all de Matcher kënnt Dir am RTL-Ticker noliesen.
Den Iwwerbléck vun de Resultater
