De franséische Schauspiller Alain Delon ass am Alter vun 88 Joer gestuerwen, dat huet seng Famill matgedeelt.

Sengen dräi Kanner Alain Fabien, Anouschka an Anthony no wier hie "friddlech a sengem Haus zu  Douchy" an der Géigend vu Paräis verstuerwen. Fir d'Famill, déi ëm de Respekt vun hirer Privatsphär gebieden huet, wier et ee "besonnesch schwéiere Moment vun der Trauer". Seng Gesondheet hat sech no enger Serie vun Hiereschléi net méi erholl.

Den Delon gëllt als Legend vum franséische Kino, net nëmmen als Schauspiller, mee och als Produzent a Realisateur. Bekannte Filmer ware "Plein Soleil", "La Piscine", "Rocco et ses Frères" oder "Borsalino".
An de 60er a 70er Jore war hien ee vun de populäerste Schauspiller am europäesche Kino. Vun 2010 un huet sech den Delon da méi fir Theater interesséiert.

2018 dréit hie säi leschte Film, ma wéinst gesondheetleche Problemer ass dee Projet net fäerdeg ginn. 2019 gouf hien zu Cannes mat enger Éiere-Palm fir säi Liewenswierk geéiert, déi lescht vun enge sëllegen Auszeechnungen.
 
An de Schlagzeile war den Delon awer net nëmme wéinst sengem beruffleche Succès, mee och wéinst privaten Turbulenzen. Seng laangjäreg Bezéiung mat der däitscher Schauspillerin Romy Schneider huet hien ëmmer nees an d'Schlagzeile bruecht. A rezente Jore waren et virun allem Streidereie vu senge Kanner ëm dem Alain Delon seng Finanzen a seng Gesondheet, déi fir Opmierksamkeet gesuergt haten.

Den Alain Delon mam Romy Schneider am Film "La Piscine" vun 1969. Nach 2019 hat hien d'Romy Schneider als "Léift vu sengem Liewen" bezeechent. / © SNC/ TRITONE CINEMATOGRAFICACollection ChristopheL via AFP
An de 60er Joren huet den Alain Delon et séier zu enger franséicher Film-Legend gepackt. / © Afp
Den Alain Delon am Film "Rocco et ses frères" vun 1960. / © MARCEAU COCINOR - TITANUS SPACollection ChristopheL via AFP
Den Alain Delon huet d'Nathalie Delon 1964 bestuet, ma no e puer stiermesche Joren gouf d'Koppel 1969 nees gescheet. / © Afp
Den Alain Delon un der Säit vum Jean-Paul Belmondo am Film "Borsalino" vun 1970. / © ADEL PRODUCTION - MARIANNE PRODUCollection ChristopheL via AFP
Den Alain Delon am Film "Le jour et la nuit" vun 1997. / © CANAL + / CNCCollection ChristopheL via AFP
2019 krut den Alain Delon zu Cannes eng Palme d'or fir säi Liewenswierk. / © Afp
Den Alain Delon mam Romy Schneider am Joer 1968. / © Afp
Och a senge spéidere Joren war den Alain Delon nach ëmmer Gaascht um rouden Teppech. / © AFP/LOIC VENANCE
Les photos diffusées sur ce site sont soumises à des droits d’auteurs et ne peuvent être copiées, modifiées, vendues, sans l’autorisation préalable du propriétaire du site en question.

Den Alain Delon war keen onëmstriddene Charakter. Hie gouf an der Vergaangenheet accuséiert, e Chauvinist gewiescht ze sinn an och géint eng vu senge Frae gewalttäteg gewiescht ze sinn. Och seng Ënnerstëtzung fir de Front National huet fir Diskussioune gesuergt. 1968 ass dem Delon säi Bodyguard ëmbruecht ginn. Well deen eng Affär mat senger deemoleger Fra Nathalie Delon gehat soll hunn, stoung och den Alain Delon an der Ëffentlechkeet am Verdacht.

E Sonndeg de Moie koumen och schonn déi éischt politesch Reaktiounen op den Doud vun der franséischer Kino-Legend Alain Delon. De franséische President Emmanuel Macron huet de Schauspiller op X als "franséischt Monument" bezeechent.

Den Eric Ciotti, dee sech bei de Wale mat dem Rassemblement National zesumme gedoen hat, huet op der Plattform X dem Delon säi Patriotismus gelueft. Hien hätt als "Homme de droite" ëmmer eng bestëmmten Iddi vu Frankräich vertrueden. D'Valérie Pécresse, Presidentin vun der Ile de France, schreift och op X: "Äddi, léiwen Alain."