Den Elon Musk dreift den Ëmbau vun Twitter virun: Wéi schonn an enger Mail ugekënnegt, gouf e Freideg ronn d'Hallschent vun de Mataarbechter entlooss.

Der Noriichtenagence AFP läit eng E-Mail vir, déi en Donneschdeg un all d'Employéeë vun der Entreprise gaangen ass an där no e Freideg eng annoncéiert gëtt, wie bleiwen dierf a wien net.

D'Washington Post an d'New York Times mellen, datt ronn d'Hallschent vun der 7.500 Mataarbechter hir Aarbechtsplaze verluer hunn. An der Mail, déi duerch d'Entreprise goung, goufen d'Mataarbechter ugewisen, heem ze goen an e Freideg net op d'Aarbecht ze kommen. D'Plattform géing "duerch de schwierege Prozess vun der Personalreduktioun" goen, fir d'Entreprise op e "gesonde Pad" ze bréngen, heescht et weider an der Mail. Dës Mesure wäert "sëllege Mënschen treffen, déi e wäertvolle Bäitrag fir Twitter geleescht hunn", wier awer "leider néideg, fir de Succès vun der Entreprise an Zukunft ze garantéieren".

Eng Rei entloosse Mataarbechter hu schonn ëffentlech op hir Kënnegung reagéiert. D'Twitter-Managerin Michele Austin huet op Twitter geschriwwen: "Ech si mat der Noriicht waakreg ginn, datt meng Zäit bei Twitter op en Enn komm ass. et brécht mer d'Häerz, ech wëll et net wouer hunn."

Verschidde Leit hate schonn am Virfeld matgedeelt, datt si hir Zougäng blockéiert kruten a si dowéinst géifen dovunner ausgoen, datt si hir Aarbecht géife verléieren.

Fënnef fréier Mataarbechter hu schonn eng Sammelklo géint Twitter agereecht, well d'Entreprise hinnen net wéi virgesinn 60 Deeg Preavis ginn huet.

Ganz iwwerraschend kommen d'Kënnegunge fir d'Employéeë vun Twitter allerdéngs wuel net. Schonn Enn Oktober, nodeems den Elon Musk d'Online-Plattform fir 44 Milliarden Dollar kaf hat, huet hien de Chef vum Messengerdéngscht, de Parag Agrawal an aner wichteg Manager gekënnegt. De Musk wëll de Joresëmsaz vun Twitter vu 5 Milliarden Dollar am leschte Joer op 26 Milliarde bis 2028 erhéijen.

Twitter geréit allerdéngs elo scho finanziell ënner Drock. Dat nodeems eng Partie Konzerner, wéi General Mills oder Volkswagen, hir Budgete fir Reklamme bei Twitter en Donneschdeg agefruer hunn. Och General Motors hat seng Publicitéit op Twitter schonn d'lescht Woch als Reaktioun op d'Iwwerhuele vun Twitter vum Elon Musk gestoppt.

Vill Kritiker fäerten, datt de SpaceX- an Tesla-Chef de Messengerdéngscht fir onkontrolléiert Haassnoriichten a Falschinformatiounen opmaachen a gespaart Profiller, wéi dee vum fréieren US-President Donald Trump, erëm fräigi kéint.

Annonceure bloussstellen

Den Elon Musk dreet domadder Annonceuren, déi keng Reklamme méi op Twitter maachen, ëffentlech blousszestellen. Den neie Proprietär vun der digitaler Plattform gräift domadder d'Propos vun engem rietse Lobbyist op.

An de leschten Deeg haten ënnert anerem Volkswagen, Coca-Cola a Pfizer matgedeelt, hir Reklamm op Twitter aussetzen ze wëllen, well si sech Suerge maachen, datt hir Annoncen nieft negative Contenuen opdauchen. Dat ass kee komplett neie Phänomen. Och YouTube hat schonn domadder ze kämpfen.