Wéi gesäit d’Zukunft vum Auto aus? Oder schwätze mer an e puer Joer nëmmen nach vu “Mobilitéit”?

Genee doriwwer huet sech VW Gedanke gemaach an um Virowend vun der IAA 150 international Journalisten op München agelueden. Mat dobäi war och de Paul Origer aus eiser Automag-Redaktioun, dee sech iwwert den “New Auto” informéiert huet.

Automag: VW New Auto

Autosconstructeur war gëschter – Mobilitéitsentreprise ass muer. An déi soll, esou VW, ouni Emissiounen an autonom fonctionnéieren. Bis 2030 gëtt geplangt den CO2-Foussofdrock pro Auto ëm 30 Prozent ze reduzéieren. Anengems erwaart Volkswagen dat de Maart vun de Verbrenner erofgeet an esou den Undeel vun de verkaften Elektroautoen op 50% klëmmt. 2040 sollen all nei Gefierer vun der VW-Famill quasi 100% emissiounsfräi sinn, bis spéitstens 2050 de ganze Konzern klimaneutral ass. VW huet 73 Milliarden Euro fir dës Technologie vun der Zukunft déi nächst 4 Joer virgesinn.

Nëmmen nach 2 Plattforme fir Elektrogefierer decken deemnächst d’Palett of. Eng nei skaléierbar Plattform SSP ass dann ab 2026 d’Basis fir d’Produktioun vu rengen E-Autoen, voll elektresch, voll digital an héich skaléierbar, also fir all Modell passend. D’Hardware aleng geet awer net duer, reng em d’Software bekëmmert sech an Zukunft CARIAD – en neie Member an der grousser VW-Famill dee sech ëm dat intelligent an autonoomt Fuere këmmert. Dozou gehéieren Upgrades an Updates Over the Air – leider ginn et nach keng lëtzebuerger Wieder dofir mee et heescht esouvill wéi: den Auto ass ëmmer um leschte Stand an de Propriétaire muss dofir net vill maachen. An à propos net vill maachen; Level 4 gëtt ab 2025 versprach; dee Moment kann de Client d’Fuere sengem Auto vollstänneg iwwerloossen.

Performant Software an elektrescht Fueren – alles schéin a gutt. Mee ouni déi néideg Energie, spréch Batterien fonctionéiert d’Zukunft net. An enger vu 6 geplangte Giga-Batteriefabriken, do wou haut Motore gebaut ginn, nämlech zu Salzgitter, soll ab 2025 mam chinesesche Spezialist Gotion High Tech eng eege Batterietechnik entwéckelt ginn. Och d’Luede gëtt méi konfortabel a méi einfach; bis zu 350 Kilowatt – dat héchst wat aktuell méiglech ass – packen déi nei Schnellluedstatiounen. Insgesamt wëll de VW-Konzern 18.000 esou High Performance Charger an Europa installéieren.

Gläich zwee Highlights an engem hat VW op hir New-Auto-Soirée matbruecht: den nach getarnten Elektro-Van ID.Buzz an domat anengems e Pilotprojet deen deemnächst zu München start. Nämlech dee vum autonome Shuttle; net ze iwwersinn sinn déi onzieleg Radare, Kameraen a performant Lidare déi den ID.Buzz eleng duerch d’Stroosse fuere loossen. Hindernisser evitéieren, Geforen erkennen, Situatiounen aschätzen – et ass erstaunlech wéi performant d’Software ginn ass. 2025 plangt VW, säin éischten autonome Mobilitéitsservice an Europa a kuerz duerno an den USA unzebidden. An dat kéint zum grousse Geschäft ginn; bis 2030 soll de Marché fir Mobilitéit als Service eleng an de 5 gréissten europäesche Mäert op 70 Milliarden US-Dollar kommen.

Grouss Verännerunge stinn also virun der Dir, besonnesch fir ronn 330.000 Mataarbechter vu VW, déi haut nach “traditionell” Autoe bauen. An den nächsten 10 Joer gëtt e massiven Transformatiounsprogramm ëmgesat, zum groussen E-Mobilitéitszentrum gëtt d’Wierk zu Zwickau – e Wierk mat Geschicht – keen anere wéi den Trabant ass hei virun iwwer 60 Joer vum Band gelaf.