• De PLUS

    • nach ëmmer ee vun deene schéinsten SUV
    • Leeschtung am Iwwerfloss
    • Sound mat Hingerhauteffekt
    • erstaunlech dynamesch trotz Gewiicht
  • De MINUS

    • Kappstützen drécken an de Réck
    • bësse schwiereg ze bedéngen
    • Präis an Ënnerhalt

6 Joer ass et elo schonn hier, datt Jaguar mam F-Pace hiren éischten SUV lancéiert huet – net feelen duerft schonn deemools d’Topversioun SVR.

A genee déi hat de Paul Origer elo an der aktuellster Versioun am Test.

Automag: Jaguar F-Pace SVR

Et ass am Fong eng Spezies, déi um Ausstierwen ass, grouss Verbrennermotore mat héijer Leeschtung, mee Jaguar hält awer un hirer Traditioun fest a lancéiert och no engem klenge Facelift vum F-Pace nees den SVR-Topmodell. Mat elo nach méi Rennsport an Aerodynamik am Baussendesign, soss gëtt just diskret op d’Potenz ënnert dem Capot higewisen. Mir perséinlech gefält den F-Pace vun den SUV alleguer nach am beschten – wann et onbedéngt ee misst sinn.

Gëllt dat dann och fir de Banneraum?

Jo, deem kéint ech duerchaus zoustëmmen, den SVR bitt e gelongene Mix aus Faarwen a Matièren, genee esou confortabel wéi effikass Sportsëtzer an emol guer keng esou schlecht Plazverhältnisser. Och d’Veraarbechtung läit definitiv um Premium-Niveau. Okay, et muss een de Kapp beim Eraklammen awer e bëssen anzéien an d’Kappstütz vun de schlanke Performance-Sëtzer huet mir onangeneem an d’Kräiz gedréckt.

RTL

© Paul Origer / RTL

An och e puer Schrullegkeete wéi déi e bësse widderspensteg Knäppercher an der Mëttelkonsol oder verstoppte Funktiounen am fonkelneien Infotainment schéngen iergendwéi ëmmer dozou ze gehéieren.

Mee dat ass jo am Fong net dat wichtegst un dëser Versioun – ech ginn dovunner aus, d’Technik ënnert dem Capot spillt déi gréisste Roll?

Definitiv an ech wäert no dësem Test mussen an de CO2-Beichtstull wanderen – mee keen anere Motor ka fir esouvill Emotioune suerge wéi ee V8. Zemools wann en esou gutt am Fudder steet wéi deen am F-Pace SVR.

5 Liter, 550 PS a 700 Nm si gewalteg Wäerter, och wa verschidden Elektroautoen dës entre-temps iwwerbidden. Am SVR kommen allerdéngs Dimensiounen dobäi, déi et bei der E-Mobilitéit net ginn. An dat ass Héieren a Fillen, datt engem d’Hoer um Aarm opstinn. Vu Con fuoco iwwer Furioso bis bei Molto Staccato kritt de Chauffer aus deene 4 aarmdécken Auspuffréier all Nuance ze héieren an ze spieren.

RTL

© Paul Origer / RTL

An dat kann den F-Pace SVR och um Terrain – pardon: op der Strooss ëmsetzen?

Soe mer esou: mat 550 PS dierft et scho virugoen. Am Fall vum F-Pace SVR stinn deem awer och minimum 2,2 Tonne géigeniwwer. Déi schéngen de V8 mat Twin-Vortex-Kompressor net ze krazen, wann ee wëll, dann huet déi ultraflénk ZF-Automatik d’Gäng séier duerch an a 4 Sekonne si schonn 100 km/Stonn erreecht. An dat iwwerschaffte Fuerwierk, esou wéi déi nei ofgestëmmte Feedback-freedeg Steierung huelen engem an de Kéieren den Elan och net eraus.

RTL

© Paul Origer / RTL

Kloer, d’Gewiicht spiert ee wann et ëm den Eck goe soll an déi héich Sëtzpositioun ass net terribel sportlech. Mee d’Ingenieuren hunn de beschtméigleche Spagat tëscht Confort a Sport fäerdeg bruecht. Well den SVR kann och gemittlech cruisen, wann och déi grouss 22-Zoll-Rieder relativ haart iwwer Kanaldeckel polteren an d’Automatik beim Erofschalten nawell vill ruckt.

Ech mierke, bei dir fléisst awer nach vill Bensinn am Blutt – de Präis wäert deem ganzen awer den Dämpfer opsetzen?

Nujee, fir d’éischt déi gutt Nouvelle: no iwwer 500 km Testfaart hat sech de Verbrauch bei wierklech raisonnabelen 13 Liter agependelt. Mee do virdrun muss ee fir een F-Pace SVR mol ronn 110.000 Euro labber gemaach hunn. Mat e puer flotten Optiounen, wéi bei eisem Testauto, kënnen et der och 120 sinn. Spillt dat keng Roll, da géing ech soen: zougräifen!

RTL

© Paul Origer / RTL