Virum grousse Wiessel an d’Mammenhaus BMW presentéiert Alpina ënnert anerem hir nei Mëttelklass

Bestseller
D’Modeller B3 an D3S sinn ouni Zweifel déi wichtegst Modeller vum Veredler aus Buchloe. De Facelift iwwerhëlt déi optesch Verännerunge vum 3er, verpasst de Motoren awer nach emol méi Leeschtung. An engems goufen d’Equipementer opgestockt.

Parallel dozou huet Alpina déi nei B4 Gran Coupé an D4S Gran Coupé lancéiert. 4-diereg Coupéen leie voll am Trend, besonnesch wa se a punkto Motorleeschtung e Krack zouleeën.

Wann et méi dierf sinn
Eng Klass driwwer gouf de grousse Brudder B8 Gran Coupé renovéiert a leet, anescht wéi den M-Modell vu BMW, grousse Wäert op Confort. Optësch falen déi beliichten Nier an nei Faarwen op. De Summum bei Alpina, den XB7 war dann och zeideg fir eng Aktualisatioun. Besonnesch déi nei Front fält op, ënnert dem Capot kënnt Mildhybrid-Technik mat bis zu 621 PS an den Asaz. Ob den XB7 um Festival ze gesinn ass, ass nach net confirméiert.