No engem Feierwierk vun neien Elektro-Modeller besënnt sech Audi nees sénge sportleche Wuerzelen

All Regester gezunn
Vu Kompakt bis Supersportsween; d’Audi Sport GmbH huet sech quasi déi ganz Gamm virgeknäppt an op héich Leeschtung a vill Emotioune getrimmt; d'Modeller R8 V10 performance RWD, RS 6 Avant performance, RS 7 Sportback performance, RS 3 Sportback / Limousine performance, TT RS Coupé iconic edition an RS Q3 / Q3 Sportback edition 10 years markéieren déi nei Spëtzt vun hirer Gamme.

Ganz uewe situéiert, wann och net a punkto Sport méi éischter am Domaine vum Luxus an techneschen Innovatiounen ass deen neien A8. Vu bausse bleift de Facelift bis op déi nei Highend-Luuchten diskret, ënnert dem Blech gëtt et ënnert anerem nei Confort-Features an en iwwerschafften Infotainment.

Highlight
Star vum Festival gi sécherlech de Q8 e-tron a Q8 e-tron Sportback. Den Nofolger vum Elektro-Pionéier e-tron vun 2018 ass den neien Topmodell an der SUV-Gamm vun Audi. Dee knapp 5 Meter laange Q8 e-tron gëtt an zwou Karosserien ugebueden an huet sech a punkto Technik wiesentlech verbessert. D’Leeschtung läit elo tëscht 250 an 370 kW, bei der Autonomie versprécht Audi tëscht 491 a 600 km.